Самарқанд вилояти Оқдарё туманида танишининг Lacetti автомобилини олиб қочган маст киши машинани бетон тўсиққа урди, дея хабар бермоқда Тергов департаменти.
Маълум қилинишича, 2020 йилнинг 2 ноябрь куни соат 15:00 ларда 33 ёшли Феруз Н. ўзига тегишли бўлган Lacetti русумли автомашинани бошқариб, танишлари 33 ёшли Олим М. ва 30 ёшли Жасур П. билан бирга Оқдарё тумани Лойиш шаҳарчаси Наврўз кўчасида жойлашган ошхонага овқатланиш мақсадида борган.
Улар автомашинани ошхонанинг ҳовлисида қолдириб, ошхонада танишлари билан спиртли ичимлик истеъмол қилган. Сўнг Феруз Н.нинг маст ҳолатдаги таниши Жасур П. унга тегишли бўлган Lacetti русумли автомашинасининг эшиги қулфланмаганлигидан ва ўт олдириш калити турганлигидан фойдаланиб автомашинани олиб қочган.
У автомашинани Оқдарё тумани «Болта» қишлоғининг ички йўлида ҳайдаб кетаётган вақтида бошқарувни йўқотиб, бетон тўсиққа бориб урилган ва йўл-транспорт ҳодисасини содир қилган.
Ҳолат юзасидан 2020 йилнинг 24 ноябрь куни Оқдарё туман ИИБ ҳузуридаги Тергов бўлими томонидан Жиноят кодексининг 267-моддаси 1-қисми (транспорт воситасини олиб қочиш) билан жиноят иши қўзғатилган.
Ҳозирда тергов ҳаракатлари олиб борилмоқда.
Аввалроқ Хоразмда Nexia ва Howo тўқнашуви оқибатида бир киши ҳалок бўлгани, Қорақалпоғистонда юз берган ЙТҲ оқибатида 1-синф ўқувчиси вафот этгани ҳамда Ғузорда Nexia йўлдан ўтаётган пиёдани уриб кетиши оқибатида жабрланувчи вафот этгани ҳақида хабар қилинганди.
Изоҳ (0)