Россия президенти матбуот котиби Дмитрий Песков Владимир Путиннинг 26 ноябрь куни Саров шаҳрига (Нижний Новгород вилояти) ташрифи давомида ниқобсиз юрганига изоҳ берди. Бу ҳақда Meduza маълум қилди.
Сўнгги суткада Россияда коронавирус қайд этилганлар сони кескин ошди, мамлакат пойтахтида ҳам касалланганлар сони ортиши бўйича мутлақ рекорд қайд этилди. Шундай шароитда Путиннинг Саровга ташрифи тўғридан-тўғри намойиш этилган лавҳа фаол муҳокамаларга сабаб бўлмоқда. Унда одамлар президентни ниқоб тақмаган, ижтимоий масофа сақламаган ҳолда кутиб олгани акс этган, Путиннинг ўзида ҳам ниқоб ҳам, қўлқоп ҳам бўлмаган. Бундан ташқари, у одамлар билан қўл бериб сўрашган.
«Президент эпидемиологик хавфсизлигини таъминлаш учун зарур чоралар кўрилган эди», — деган Дмитрий Песков бу вазиятга изоҳ сўраган журналистларнинг саволига жавобан. Бироқ бу қандай чора эканлигига аниқлик киритмаган.
Шунингдек, давлат раҳбари кўпчилик россияликлар учун намуна бўлгани учун вазият қанчалик хавфлилигини кўрсатиш мақсадида ҳимоя чораларига амал қилиши керак эмасми, деган савол берилган.
«Албатта, намуна бўлиш бу — муҳим, аммо президент борасида у билан учрашадиган одамларнинг эпидемиологик хавфсизлиги ҳам тегишли равишда таъминланганлигини унутмаслик керак. Бу шунчаки оддий оммавий назоратсиз мулоқот эмас», — деган президент матбуот котиби.
Журналистнинг ахир оддий одамлар буни билмайди-ку, деган гапига жавобан Дмитрий Песков «Мана, шу баҳонада улар бу ҳақда билиб олади», деб жавоб берган.
Мавзуга доир:
- Россияда COVID-19 асоратларидан вафот этганлар учун ўликхоналарда жой етишмаётгани хабар қилинди
- Россияда пандемия бошланганидан буён ортиқча ўлим ҳолати 120 минг кишини ташкил этган. Бу тезкор штабнинг COVID-19 борасидаги маълумотларидан тўрт баробарга кўп
- Москвада коронавирус туфайли чеклов чоралари 15 январгача узайтирилди
Изоҳ (0)