SARS-CoV-2 вируси одамларга бир ёки бир неча турга мансуб ҳайвонлардан юққан бўлиши мумкин. Касаллик ҳайвонлар организмига мослашиб кетган, деган Жаҳон соғлиқни сақлаш ташкилоти лабораторияси эксперти Франк Конингс ташкилотнинг расмий Twitter’ида ўтказилган савол-жавоб шаклидаги онлайн-сессияда.
«Иккита тахминий сценарий мавжуд. Биринчисига кўра, вирус тўғридан-тўғри кўршапалаклардан одамга юққан ёки тезда тўлиқ мослашган. Бу содир бўлиши мумкин бўлган, аммо эҳтимоли жуда кам тахмин. Иккинчи сценарий бўйича вирус кўршапалаклардан бир ёки бир нечта бошқа ҳайвонларга юққан, улар организмига мослашган, сўнгра одамларга ўтиб кетган», — дейди у.
Конингснинг қайд этишича, одамга мослашмаган вирус версиясини топишнинг имкони бўлса, бу одамлар зарарланиши учун муҳим ўзгаришни ўрганиш ва коронавирусга қарши самарали вакцина ёки дорилар яратишда қўл келади.
Экспертнинг сўзларига кўра, ҳозирда турли жониворларда, хусусан, қишлоқ хўжалиги ва уй ҳайвонларида тадқиқотлар олиб борилмоқда. Уларнинг касалликни юқтириб олиш хавфи ва вирус учун резервуар бўлиш эҳтимоли аниқланмоқда. Келажакда улар учун ҳам алоҳида вакцина ишлаб чиқилиши мумкин.
«Мушуклар ва итларнинг вирус билан зарарланишга қисман мойиллиги борлигини биламиз. Вирус яқин келажакда атрофимизда айланиб юрадиган бўлса, ҳайвонларни эмлаш яхши ғоя бўлади. Айрим уй ҳайвонлари коронавирус юқтириб олишга мойил, бироқ қоракўзанларчалик эмас. Улар касалланмайди, вирусни енгил юқтиради, ўзлари ҳам зарарланиши мумкин», — деган эксперт.Бутун дунёда COVID-19 коронавирус инфекциясини юқтириб олганлар сони 60 миллиондан ошган, 1,4 миллиондан ортиқ бемор касаллик асоратлари оқибатида вафот этган. Касалланиш энг кўп қайд этилган давлатлар АҚШ, Ҳиндистон, Бразилия бўлиб турибди, уларнинг ортидан Франция, Россия, Испания, Буюк Британия, Италия, Аргентина ва Колумбия бормоқда.
Изоҳ (0)