Москва мэри Сергей Собянин коронавирус инфекцияси тарқалиши туфайли жорий қилинган бир қатор чеклов чоралари 2021 йил 15 январгача узайтирилишини эълон қилди, деб ёзади Meduza.
Мэр фармонига кўра, 65 ёшдан катталар ва сурункали касалликлари бор одамларга уй режимига риоя қилиш тавсия этилади. Пойтахтдаги корхона ва ташкилотлар ўз ходимларининг камида 30 фоизини масофадан ишлашга ўтказиши керак. Бундан ташқари, январь ўрталаригача шаҳардаги болалар учун дам олиш масканлари ёпиқ бўлади.
Бу чекловлар сентябрь охирида Москвада COVID-19’га чалинишнинг иккинчи тўлқини бошланганидан кейин киритилган, сўнг бир неча марта узайтирилган эди.
«Ушбу режимда биз келаётган 1,5 ой давомида яшашимиз керак бўлади. Ва ҳатто Янги йилни ҳам биз оилавий байрам сифатида — кичик даврада нишонлаймиз. Аммо шу билан бирга, саноат корхоналари, бизнес, дўконлар, хизмат кўрсатиш соҳаси ўз ишини давом эттиради. Кўрилган чоралар шарофати билан ҳозирча пандемиянинг баҳордагидек оғир тус олиб, ҳамма жойлар ёпиладиган ҳолатдан узоқдамиз», — деди мэр.
Аввалроқ Москвада ОТМлар талабалари ва катта синф ўқувчилари масофавий таълимга ўтказилган эди. Шунингдек, шаҳарда ресторан ва клубларнинг тунги вақтда ишлаши тақиқланган, театр, кинотеатр ва концерт залларида томошабинларнинг максимал сони чекланган (залнинг умумий сиғимининг 25 фоизидан ошмаслиги керак), ҳамда томошабинлар иштирокида маданий, кўнгилочар ва маърифий тадбирлар ўтказиш тўхтатилган эди, ҳукумат ташкиллаштирадиган тадбирлар бундан мустасно. Бу чекловларнинг барчаси 2021 йил 15 январгача амал қилади.
Изоҳ (0)