Бухорода ер майдони ажратиш эвазига тадбиркордан 22,5 минг доллар пора олган шахслар қўлга олинди

Бухоро вилоятининг Ромитан туманида ер майдони ажратиш эвазига тадбиркорни 45 минг доллар пора беришга ундаган шахслар 22,5 минг долларни олаётган вақтида қўлга олинди, дея хабар берди «Дарё» мухбири.

Таъкидланишича, 2020 йилнинг 12 ноябрь куни Бош прокуратура ҳузуридаги Иқтисодий жиноятларга қарши курашиш департаментининг Бухоро вилоят бошқармаси ва ДХХ ходимлари томонидан Вобкент туманидаги «МММ» МЧЖнинг 26 ёшли раҳбари К.П.нинг аризаси юзасидан тезкор тадбир ўтказилган.

Аризага кўра, фуқаролар А.Х. ҳамда С.Т. ваколатли танишлари орқали Ромитан тумани марказидан иккита кўп қаватли уй қуришга мўлжалланган ер майдони ажратиши эвазига тадбиркор К.П.ни 45 минг доллар пора беришга ундаган. Ва сўралган пулнинг маълум миқдорини олдиндан бериши лозимлигини айтган.

2020 йилнинг 12 ноябрь куни ишбилармон «ер сотувчи»лар Бухоро шаҳридаги «Парранда» ошхонасида кимёвий ишлов берилган 22,5 минг долларни пора тариқасида олаётган пайтда қўлга олинган.

Мазкур ҳолат юзасидан А.Х. ва С.Т.га нисбатан Жиноят кодексининг 168-моддаси (фирибгарлик) ва 28-моддаси (жиноят иштирокчиларининг турлари), 211-модда (пора бериш) билан жиноят иши қўзғатилган. Тергов ҳаракатлари олиб борилмоқда.