Учтепа туманидаги «Атлас» савдо мажмуаси биносида COVID-19 ва атипик пневмонияга чалинган беморлар учун ташкил этилган тақсимот маркази ёпилди. Бу ҳақда «Коронавирус Инфо» канали хабар берди.
Шунингдек, тез орада Тошкент шаҳридаги «Ёшлик» спорт мажмуасида ташкил этилган марказ фаолияти ҳам тўхтатилади.
Эслатиб ўтамиз, Президент Шавкат Мирзиёев раислигида 17 ноябрь куни бўлиб ўтган видеоселекторда Ўзбекистон бўйича 89 та муассасада 17 500 та ўрин COVID-19 билан касалланганлар учун ажратилгани ҳамда ушбу ўринларда 6570 нафар бемор даволанаётгани ва койкалар бандлиги республика бўйича эса 38 фоизни ташкил этиши маълум қилинганди. Шу муносабат билан, мутасаддиларга коронавирусга ихтисослашган шифохоналар фаолиятини чуқур ўрганиб, уларни оптимизация қилиш топшириғи берилганди.
Тошкент шаҳар Учтепа туманида жойлашган «Атлас» савдо мажмуаси биносида 1000 ўринга мўлжалланган коронавирусга чалинган ва гумон қилинган беморларни қабул қилиш ва тақсимлаш маркази сентябрь ойининг охирида ишга туширилганди.
Тошкент шаҳар Шайхонтоҳур туманидаги «Ёшлик» спорт мажмуаси июль ойининг охирида коронавирус ташхиси қўйилган беморларни даволаш учун 520 ўринли махсус марказга айлантирилганди.
Изоҳ (0)