Қашқадарё вилоят соғлиқни сақлаш бошқармаси бошлиғи ўзгарди

Соғлиқни сақлаш вазирининг тегишли буйруғи билан Республика шошилинч тиббий ёрдам илмий маркази Қашқадарё филиали директори вазифасида ишлаб келган Равшан Тулаков Қашқадарё вилоят соғлиқни сақлаш бошқармаси бошлиғи этиб тайинланди. Бу ҳақда вазирлик матбуот хизмати хабар берди.

Тиббиёт фанлари номзоди, 48 ёшли Равшан Тулаков Республика шошилинч тиббий ёрдам илмий маркази Қашқадарё филиали хирургия бўлими врачи, филиалнинг умумий масалалар бўйича директор ўринбосари лавозимларида ишлаган.

Шунингдек, соғлиқни сақлаш вазирининг буйруғи билан Набижон Йўлдошев Республика ихтисослаштирилган кардиология илмий-амалий тиббиёт маркази Қарши филиалига директор этиб тайинланган.

Тиббиёт фанлари доктори Набижон Юлдошев Республика ихтисослаштирилган кардиология маркази навбатчи шифокори, аспиранти, юрак аритмияси лабораторияси кичик илмий ходими, юрак аритмиясининг оғир турларини жарроҳлик йўли билан даволаш ва электрофизиология текшируви бўлими мудири лавозимларида ишлаган. «Ўзбекистон Республикасида хизмат кўрсатган соғлиқни сақлаш ходими» фахрий унвони билан тақдирланган.

Эслатиб ўтамиз, Ўзбекистон Президентининг 12—13 ноябрдаги Қашқадарё вилоятига ташрифи давомида тизимдаги қатор муаммолар танқидий кўриб чиқилган эди. Янги раҳбарга ҳудуднинг тиббий салоҳиятини юксалтириш, чекка қишлоқ жойларига малакали тиббиёт ходимларини жалб қилиш, аҳоли орасида соғлом турмуш тарзи ва тўғри овқатланиш маданиятини ошириш каби қатор вазифалар юклатилган.

Эслатиб ўтамиз, 9 ноябрь куни Ўзбекистон соғлиқни сақлаш вазирининг тегишли буйруғи билан Мурад Қурбонов Қорақалпоғистон соғлиқни сақлаш вазири этиб тайинланган.

Аввалроқ Ўзбекистон Президентининг фармони билан Абдуҳаким Хожибоев соғлиқни сақлаш вазири этиб тайинлангани тўғрисида хабар берилганди. Хожибоев 2020 йил 15 июль кунидан бери соғлиқни сақлаш вазири биринчи ўринбосари сифатида ишлаётган эди.

2017 йилнинг февралидан буён соғлиқни сақлаш вазири сифатида фаолият юритган Алишер Шодмонов эса Тошкент тиббиёт академияси ректори этиб тайинланган. Республика ихтисослаштирилган эндокринология илмий-амалий тиббиёт маркази директори бўлиб ишлаган Анвар Алимов эса соғлиқни сақлаш вазири ўринбосари — Тошкент шаҳар ССББ бошлиғи этиб тайинланганди.