Sog‘liqni saqlash vazirining tegishli buyrug‘i bilan Respublika shoshilinch tibbiy yordam ilmiy markazi Qashqadaryo filiali direktori vazifasida ishlab kelgan Ravshan Tulakov Qashqadaryo viloyat sog‘liqni saqlash boshqarmasi boshlig‘i etib tayinlandi. Bu haqda vazirlik matbuot xizmati xabar berdi.
Tibbiyot fanlari nomzodi, 48 yoshli Ravshan Tulakov Respublika shoshilinch tibbiy yordam ilmiy markazi Qashqadaryo filiali xirurgiya bo‘limi vrachi, filialning umumiy masalalar bo‘yicha direktor o‘rinbosari lavozimlarida ishlagan.
Shuningdek, sog‘liqni saqlash vazirining buyrug‘i bilan Nabijon Yo‘ldoshev Respublika ixtisoslashtirilgan kardiologiya ilmiy-amaliy tibbiyot markazi Qarshi filialiga direktor etib tayinlangan.
Tibbiyot fanlari doktori Nabijon Yuldoshev Respublika ixtisoslashtirilgan kardiologiya markazi navbatchi shifokori, aspiranti, yurak aritmiyasi laboratoriyasi kichik ilmiy xodimi, yurak aritmiyasining og‘ir turlarini jarrohlik yo‘li bilan davolash va elektrofiziologiya tekshiruvi bo‘limi mudiri lavozimlarida ishlagan. “O‘zbekiston Respublikasida xizmat ko‘rsatgan sog‘liqni saqlash xodimi” faxriy unvoni bilan taqdirlangan.
Eslatib o‘tamiz, O‘zbekiston Prezidentining 12—13-noyabrdagi Qashqadaryo viloyatiga tashrifi davomida tizimdagi qator muammolar tanqidiy ko‘rib chiqilgan edi. Yangi rahbarga hududning tibbiy salohiyatini yuksaltirish, chekka qishloq joylariga malakali tibbiyot xodimlarini jalb qilish, aholi orasida sog‘lom turmush tarzi va to‘g‘ri ovqatlanish madaniyatini oshirish kabi qator vazifalar yuklatilgan.
Eslatib o‘tamiz, 9-noyabr kuni O‘zbekiston sog‘liqni saqlash vazirining tegishli buyrug‘i bilan Murad Qurbonov Qoraqalpog‘iston sog‘liqni saqlash vaziri etib tayinlangan.
Avvalroq O‘zbekiston Prezidentining farmoni bilan Abduhakim Xojiboyev sog‘liqni saqlash vaziri etib tayinlangani to‘g‘risida xabar berilgandi. Xojiboyev 2020-yil 15-iyul kunidan beri sog‘liqni saqlash vaziri birinchi o‘rinbosari sifatida ishlayotgan edi.
2017-yilning fevralidan buyon sog‘liqni saqlash vaziri sifatida faoliyat yuritgan Alisher Shodmonov esa Toshkent tibbiyot akademiyasi rektori etib tayinlangan. Respublika ixtisoslashtirilgan endokrinologiya ilmiy-amaliy tibbiyot markazi direktori bo‘lib ishlagan Anvar Alimov esa sog‘liqni saqlash vaziri o‘rinbosari — Toshkent shahar SSBB boshlig‘i etib tayinlangandi.
Izoh (0)