Ўзбекистон Бош прокурорининг буйруғига асосан адлия катта маслаҳатчиси Шоҳрух Аминов Сирдарё вилояти прокурори лавозимига тайинланди. Бу ҳақда идора матбуот хизмати хабар берди.
Шоҳрух Аминов (1981 йилда Қашқадарё вилоятида туғилган) Самарқанд давлат университетини 2002 йилда ҳуқуқшунос мутахассислиги бўйича тамомлаган. 2004—2010 йилларда Самарқанд шаҳар прокуратурасида турли лавозимларда ишлаган, 2010 йилда Самарқанд вилояти прокуратураси фуқароларнинг ҳуқуқ ва эркинликлари, жамият ва давлат манфаатларини ҳимоя қилиш бўлими прокурори этиб тайинланган, 2013—2014 йилларда Пастдарғом тумани прокурори ўринбосари лавозимида фаолият олиб борган.
2014 йилдан Аминовнинг республика Бош прокуратурасида фаолияти бошланган — 2014—2015 йилларда Бош прокуратуранинг Қонунчилик ижроси устидан назорат Бош бошқармаси таркибидаги давлат ва хўжалик бошқарув органлари ҳамда жойлардаги ижро ҳокимияти органларида қонунчилик ижроси устидан назорат бошқармаси прокурори, катта прокурори, 2015—2016 йилларда Бош прокуратуранинг Қуролли Кучлар, Миллий хавфсизлик ва божхона органларида қонунлар ижроси устидан назорат бошқармаси бошлиғининг ўринбосари сифатида ишлаган.
Шоҳрух Аминов 2017 йилда Тошкент вилояти прокурори ўринбосари, 2017—2018 йилларда МИБда бошқарма бошлиғи, 2018 йилдан тайинловга қадар Навоий вилояти прокурори сифатида фаолият юритган.
Эслатиб ўтамиз, 10 ноябрь куни 2017 йилнинг июнидан бери Сирдарё вилояти прокурори лавозимида ишлаб келган Равшан Машарипов Самарқанд вилояти прокурори этиб тайинланганди.
Аввалроқ МИБ директори Хоразм вилояти прокурори, Жаҳонгир Ҳотамов Наманган вилояти прокурори этиб тайинлангани тўғрисида хабар берилганди.
Изоҳ (0)