Жо Байден ўз маъмуриятининг асосий аъзоларини шахсан таништирди

АҚШнинг сайланган президенти Жо Байден 24 ноябрь куни ўз маъмуриятидаги асосий тайинловларни шахсан эълон қилди. Бу ҳақда «Интерфакс» хабар берди.

«Бугун мен ўзимнинг маъмуриятимдаги халқаро сиёсат ва миллий хавфсизлик гуруҳидаги муҳим лавозимларга номзодлар ва ходимларни эълон қилишдан мамнунман. Айнан шу жамоа мамлакатимиз ва халқимиз хавфсизлигини таъминлайди», — деди Байден.

Байден, хусусан, давлат департаменти раҳбари, миллий разведка директори, ички хавфсизлик вазири лавозимларига номзодларни тақдим этди.

Шундай қилиб, Байден АҚШ давлат котибининг собиқ муовини Энтони Блинкенни Давлат департаменти раҳбари этиб тайинлашни режалаштираётганини тасдиқлади. «Блинкен маъмуриятнинг биринчи кунида иш бошлашга тайёр бўлади», — деди Байден.

Блинкен 2013—2015 йилларда АҚШнинг собиқ президенти Барак Обаманинг миллий хавфсизлик бўйича маслаҳатчиси ўринбосари бўлган. Блинкен Давлат департаменти раҳбари лавозимига асосий номзодлардан бири сифатида қаралган ва миллий хавфсизлик бўйича маслаҳатчининг ўринбосари лавозимида ишлагандан сўнг, у 2015—2017 йилларда Обама даврида давлат котибининг ўринбосари лавозимига кўтарилган.

Байден ички хавфсизлик бўйича собиқ маслаҳатчиси Алехандро Маллоркас унинг маъмуриятида ички хавфсизлик вазири лавозимини эгаллашини ҳамда бу лавозимда биринчи муҳожир ва лотин америкалик бўлишини эълон қилди.

2013—2017 йилларда АҚШ давлат котиби бўлиб ишлаган Жон Керри президентнинг иқлим масалалари бўйича махсус вакили бўлади. Байденнинг сўзларига кўра, Керрининг тайинланиши АҚШда иқлим масалаларида янги «тенденциялар»ни намоён этади.

Байден 2009—2013 йилларда АҚШ давлат котиби бўлган Ҳиллари Клинтоннинг энг яқин ёрдамчиларидан бири Жейк Салливанни АҚШ президентининг миллий хавфсизлик бўйича маслаҳатчиси этиб тайинлайди. Салливан, Блинкен сингари, Байден АҚШ вице-президенти бўлганида унинг миллий хавфсизлик бўйича маслаҳатчиси бўлган: 2009—2013 йилларда Блинкен ва 2013—2014 йилларда Салливан.

Байден АҚШ Миллий хавфсизлик бўйича маслаҳатчисининг собиқ ўринбосари Аврил Хэйнсни Миллий разведка директори этиб тайинлашга умид қилмоқда, бу лавозимни у 2015 йилдан 2017 йилгача эгаллаган. Бунгача Хэйнс Марказий разведка бошқармаси директорининг ўринбосари (2013—2015 йилларда) бўлган. Байден Хэйнс тарихда Миллий разведка директори сифатида ишлаган биринчи аёл бўлиши мумкинлигини таъкидлади. «Биз Аврил билан хавфсизроқмиз», — деди Байден.

Байденнинг сўзларига кўра, АҚШнинг БМТдаги доимий вакили Обаманинг собиқ давлат котибининг Африка бўйича ёрдамчиси Линда Томас-Гринфилд бўлади.

Байден ўз маъмурияти аъзоларини таништирган бўлса-да, бу расмий эмас, чунки бундай тайинловлар АҚШ қонунларига мувофиқ Сенатнинг маъқуллашидан ўтиши керак.

Аввалроқ Bloomberg ўз манбаларига таяниб, юқоридаги тайинловлар ҳақида хабар берганди.