Буюк Британияда 2 декабрь куни коронавирус туфайли жорий қилинган умуммиллий карантин тугайди ва у маҳаллий чекловлар билан ўрин алмашади. Бу ҳақда мамлакат бош вазири Борис Жонсон эълон қилди, деб ёзади «РБК».
Янги чоралар март охиригача сақланиб қолади, уларнинг самарадорлиги ҳар икки ҳафтада баҳоланиб боради.
Буюк Британия ҳудудлари эпидемиологик вазиятга ва чекловларнинг қатъийлик даражасига қараб учта турга ажратилади. Бутун мамлакат бўйлаб чакана савдо ва спорт заллари очилади, паб ва ресторанларнинг кечқурунги 10 гача ишлаши бўйича чекловлар олиб ташланади, кўпи билан олти киши бўлиб очиқ ҳавода учрашишга рухсат берилади.
Қайси ҳудудда қай даражада чекловлар жорий қилиниши кейинроқ маълум бўлади.
Борис Жонсоннинг айтишича, ҳукумат пандемия шароитида Рождество байрамини нишонлашнинг ўзига хос хусусиятларини кўриб чиқмоқчи. Бош вазир одамлар кекса қариндошлари билан кўришиш қандай хавфга эга эканлигини тушуниши кераклигини айтди. «Бу вирус биз билан Рождество учун сулҳ тузмайди», — деди у.
Эслатиб ўтамиз, Буюк Британия бош вазири Борис Жонсон Англияда 5 ноябрдан 2 декабргача коронавирус тарқалишини тўхтатиш мақсадида умуммиллий яккаланиш режими амал қилиши ҳақида ноябрь бошида эълон қилган эди.
Аввалроқ Англияда карантин қоидалари юмшатилиши фонида 2 декабрдан бошлаб стадионларга томошабинлар киритилишига рухсат берилиши мумкинлиги маълум қилинди.
Сўнгги маълумотларга кўра, Буюк Британияда 1,5 миллиондан ортиқ одам COVID-19’га чалинган. Жонс Ҳопкинс университети статистикасига кўра, Буюк Британия касалланганлар сони бўйича дунёда 7-ўринни эгалламоқда.
Дунёда пандемия бошидан буён 59 106 877 киши COVID-19’ни юқтириб олган, 1 395 176 киши вафот этган.
Аввалроқ Жаҳон соғлиқни сақлаш ташкилотининг COVID-19 бўйича махсус элчиси Дэвид Набарро мамлакатлар инфекцияга қарши кураш учун зарур инфратузилмани яратмаса, Европада коронавирус тарқалишининг учинчи тўлқини кўтарилиши мумкинлигини маълум қилган эди.
Изоҳ (0)