Ўзбекистонда маълум вақт кинога етарли эътибор бўлмагани сабабли соҳада турғунлик пайдо бўлган, фақат енгил-елпи, тижорат картиналари яратилиб, миллий кино ривожи дунёдан ортда қолиб кетган эди. Бу ҳақда Президент Шавкат Мирзиёев 20 ноябрь куни «Ўзбекфильм» студиясида кино санъати фахрийлари, режиссёрлар, соҳа мутасаддилари билан ўтган учрашувда айтиб ўтди.
Президент ўз нутқи давомида, жумладан, шундай деди: «Имом Бухорий, Беруний бобомиз, биринчи, иккинчи Ренессанс давридаги барча қаҳрамонларимиз тўғрисида кино қилишимиз керак. Уларнинг ҳаммаси тўғрисида 10 тадан фильм қилса арзийди. Менинг мақсадим — учинчи Ренессанс учун тўғри пойдевор яратайлик. Биринчи, иккинчи Ренессансни эса кино орқали кўрсатайлик. Эртага бу ёшларга намуна бўлади».
Учрашув давомида энг сара ўзбек фильмлари 100 талигини тузиб, давлат ва хусусий телеканалларда намойиш қилиш бўйича тавсиялар берилган.
«Кино жуда мураккаб, халқимиз, жамиятимиз учун муҳим соҳа. Кино — бу тарбия замини. ‘Тоҳир ва Зуҳра’, ‘Ўткан кунлар’, ‘Келинлар қўзғолони’ ёки ‘Олтин девор’ каби киноларимиздан 7 дан 70 ёшгача бўлган одамлар тарбия олган. Ҳозир ҳамма Шукур Бурҳоновни, Наби Раҳимовни соғиниб эслайди», — дея таъкидлади давлат раҳбари.
Аввалроқ Президент миллий кино санъати фидойиларини эътироф этиш мақсадида ҳар бир ҳудуд умумтаълим мактабларига Раззоқ Ҳамроев, Шукур Бурҳонов, Наби Раҳимов, Ҳамза Умаров, Лутфихоним Саримсоқова каби эл севган ижодкорлар номини беришни таклиф қилгани ҳақида хабар берилган эди.
Шавкат Мирзиёев 2019 йил сентябрда Тошкентда ишга тушган Президент мактабида ўтказилган учрашувда Ўзбекистонда учинчи Ренессанс даври бошланаётгани ҳақида биринчи марта фикр билдирган эди. 2020 йил августида, Тошкентда ер усти ҳалқа метро йўлининг биринчи навбати очилишида Президент Ўзбекистон учинчи Ренессанс даврига тайёрланаётганини, Мустақиллик байрамида эса мамлакатда учинчи Ренессанс даврига пойдевор қўйилаётганини таъкидлаган эди. Кейинроқ давлат раҳбари геология соҳаси учинчи Ренессанснинг пойдеворларидан бири эканини маълум қилди.
Изоҳ (0)