Сирдарё туманига янги ҳоким тайинланди, деб хабар бермоқда вилоят ҳокимлиги матбуот хизмати.
25 ноябрь куни вилоят ҳокими Ғофуржон Мирзаев иштирок этган халқ депутатлари Сайхунобод тумани Кенгашининг навбатдан ташқари сессияси ўтказилиб, унда ташкилий масала кўриб чиқилган.
Сессия қарорига асосан Сирдарё тумани ҳокими Алижон Муҳаммадиев эгаллаб турган лавозимидан озод этилиб, унинг ўрнига Ботиржон Мирзақулов тайинланди.
Ботиржон Мирзақулов 1970 йилнинг 23 февралида Сирдарё туманида туғилган. 2005 йилда Гулистон давлат университетини тамомлаган. 2018 йилдан шу кунга қадар Сайхунобод туман ҳокими лавозимида ишлаб келган.
Сирдарё вилояти ИИБ бошлиғининг жамоат тартибини сақлаш бўйича ўринбосари лавозимида ишлаб келган подполковник Фаррух Ўктамжонов Ботиржон Мирзақуловнинг ўрнига Сайхунобод тумани ҳокими этиб тайинланган.
Эслатиб ўтамиз, 24 ноябрь куни Шавкат Мирзиёев тадбиркорликни ривожлантириш масалаларига бағишланган йиғилишда иш ўринлари ташкил этиш, тадбиркорлар муаммоларини ҳал қилиш ва уларни қўллаб-қувватлаш борасида ўзибиларчиликка йўл қўйган Бухоро, Жондор ва Сирдарё туман ҳокимларини лавозимидан озод этиш масаласини қўйганди.
Аввалроқ Сирдарёнинг Миразаобод туманига Жонибек Яриев ҳоким этиб тайинлангани, Самарқанд вилоятининг Нарпай тумани ҳокими вазифасини вақтинча бажарувчи этиб Шерзод Раҳмонов номзоди тасдиқлангани, Каттақўрғон туманига 25 кун ичида иккинчи марта вақтинчалик ҳоким тайинлангани ҳақида хабар берилган эди.
Изоҳ (0)