Сирдарё вилояти Сайхунобод туманига янги ҳоким тайинланди, деб хабар бермоқда вилоят ҳокимлиги матбуот хизмати.
25 ноябрь куни халқ депутатлари Сайхунобод тумани Кенгашининг навбатдан ташқари сессияси ўтказилиб, унда ташкилий масала кўриб чиқилган.
Сессияда Ботиржон Мирзақулов бошқа ишга ўтганлиги муносабати билан туман ҳокими лавозимидан озод этилган. Туман ҳокими лавозимига 2015 йилдан буён Сирдарё вилояти Ички ишлар бошқармаси бошлиғининг жамоат тартибини сақлаш бўйича ўринбосари лавозимида ишлаб келган подполковник Фаррух Ўктамжонов тайинланди.
Фаррух Ўктамжонов 1985 йилнинг 19 сентябрида Сирдарё туманида туғилган. 2007 йилда Ўзбекистон ИИВ Академиясини тамомлаган.
Туманнинг аввалги ҳокими Ботиржон Мирзақулов қайси ишга ўтганлиги хабарда маълум қилинмаган.
Аввалроқ Сирдарёнинг Мирзаобод туманига Жонибек Яриев ҳоким этиб тайинлангани, Самарқанд вилоятининг Нарпай тумани ҳокими вазифасини вақтинча бажарувчи этиб Шерзод Раҳмонов номзоди тасдиқлангани, Каттақўрғон туманига 25 кун ичида иккинчи марта вақтинчалик ҳоким тайинлангани ҳақида хабар берилган эди.
Изоҳ (0)