Жо Байден сайловда 80 миллиондан ортиқ овоз тўплаган тарихдаги биринчи АҚШ президентлигига номзодга айланди. Мамлакатдаги йирик телеканаллар, шу жумладан, NBC, CNN ва Fox News келтириб ўтган, ҳали давом этаётган овозларни ҳисоблаш натижалари гувоҳлик бермоқда, деб ёзади Meduza.
Айни пайтгача, NBC маълумотларига кўра, демократга 80 миллион 20 минг киши овоз берган, амалдаги президент Дональд Трампга — 73 миллион 886 минг киши. Шу тариқа, Байден 306 нафар сайловчи (сайлов ҳайъати аъзоси)нинг овозига умид қилиши мумкин, сайловларда ғолиб чиқиш учун эса 270 та овоз зарур. Трампда айни пайтда 232 сайловчининг овози бор.
Сайловчилар берган овозлар сони бўйича бундан аввалги рекорд Барак Обамага тегишли эди, унга 2008 йилги сайловларда 69,4 миллион америкалик овоз берган.
Аввалроқ Дональд Трамп маъмурияти Жо Байденга ҳокимиятни топширишга тайёрлигини билдирган эди. Шундан кейин Байден ўз маъмуриятининг асосий аъзоларини шахсан таништирди. Шунингдек, демократ Жозеф Байденга разведка томонидан давлат раҳбари учун тайёрланадиган кунлик махфий ҳисоботларни тақдим этишга рухсат берилди.
Эслатиб ўтамиз, АҚШда президентлик сайлови 2020 йилнинг 3 ноябрь куни бўлиб ўтди, овозлар бир неча кун давомида ҳисоблаб чиқилди, 7 ноябрь куни АҚШнинг йирик ОАВлари сайловда Байден ғалаба қозонганини маълум қилди. Дональд Трамп эса мағлубиятни тан олмади ва сайлов бўйича судга мурожаат қилишини билдирди. У сайловлар қонунбузарликлар билан ўтган деган фикрда, шунингдек, сайловларда мамлакат конституцияси бузилганини айтган.
Изоҳ (0)