Forbes Маскнинг дунёдаги энг бой одамлар рўйхатидаги ўрни бўйича Bloomberg билан баҳслашди

Бу йил нархи анча кўтарилган Tesla компанияси акциялари кескин ўсганига қарамай, компания бош директори Илон Маск Bloomberg маълум қилганидек дунёдаги иккинчи энг бой одам эмас. «РБК»нинг ёзишича, Forbes шундай хулосага келди.

Унинг ҳисоб-китобларига кўра, Маск 126,8 миллиард долларлик бойлиги билан дунёнинг энг бой одамлари рўйхатида учинчи ўринни эгаллади, ундан олдинда фақат Amazon бош директори Жефф Безос (182 миллиард доллар) ва Франциянинг LVMH компаниялари бош директори (Louis Vuitton Moet Hennessy) Бернард Арно (140,6  миллиард доллар) турибди.

Куни кеча, 24 ноябрь куни Bloomberg Маск Билл Гейтсни ортда қолдириб, миллиардерлар орасида иккинчи ўринга чиққанлигини ёзганди. Нашр сайёрадаги энг бой одамлар рўйхатининг учинчи қаторига Microsoft асосчиларидан бирини қўйганди. Ўша пайтда Tesla асосчиси активлардан 127,9 миллиард долларга, Гейтс эса 127,7 миллиард долларга эга эди.

Forbes бизнесменнинг молиявий ҳолатини қандай баҳолаганини қуйидаги омиллар билан изоҳлаган. Биринчидан, у Tesla’нинг акцияларининг ярмидан кўпини шахсий кредитлар гарови сифатида гаровга қўйди, шунинг учун журнал унинг улушини 25 фоиз чегирма билан баҳоламоқда. Forbes шунингдек, миллиардернинг SpaceX’даги улушига 10 фоизли чегирмани қўллади (у 46 миллиард долларга баҳоланганди, Маск акцияларнинг 48 фоизига эгалик қилади). Шундай қилиб, бизнесменнинг космик гигантдаги улуши фақат 20 миллиард долларни ташкил этади холос.

Tesla қаторасига бешинчи чорак барқарор даромадни намоён этмоқда. Ўтган ҳафтада компания акциялари кўтарилиши натижасида Маск 13,5 миллиард доллар ишлаб топди. Бу компания йил охирига қадар S&P индексига кириши ҳақидаги хабарлар фонида юз берди.

Бунгача у энг бой одамлар рўйхатида Facebook асосчиси Марк Цукербергни ортда қолдирган — 19 ноябрь ҳолатига кўра, унинг бойлиги 103 миллиард долларга баҳоланган, Маск эса Bloomberg маълумотига кўра ўша вақтда 120 миллиард долларга эга бўлган.

49 ёшли Маск Tesla қимматли қоғозларининг 21 фоизига эгалик қилади. Forbes маълумотига кўра, компания нархи 2020 йилда 460 фоиздан ошди. Маск бу йил компания акцияларининг ўсишидан камида 100 миллиард доллар фойда кўрди — бу Ер юзидаги энг бой одамлар рейтингидаги бошқаларга қараганда кўпроқ.

Маск Tesla Motors’га 2003 йилда асос солган. Компаниянинг асосий фаолияти электромобил ва у билан боғлиқ технологияларни ҳамда қуёш панелларини ишлаб чиқаришдир.