Қозоғистон президенти Олмаотада дарахтлар кесилгани юзасидан текширув ўтказиш бўйича топшириқ берди

Қозоғистон президенти Қосим-Жўмарт Тўқаев Олмаотадаги Sulpak дўкони ёнидаги дарахтлар кесилгани масаласига эътибор қаратди, деб ёзмоқда «Gazeta.uz», Tengrinews’га таяниб.

Бу ҳақда президент матбуот котиби Берик Уали ўзининг Facebook’даги саҳифасида маълум қилган. Унинг билдиришича, Олмаота ҳокими Бахитжан Сагинтаевга ҳолат юзасидан текширув ўтказиш ва айбдорларни жавобгарликка тортиш вазифаси топширилган.

Дарахтлар кесилиши ижтимоий тармоқларда олмаоталикларнинг кескин эътирозларига сабаб бўлган. Айрим фойдаланувчилар бунда Sulpak компаниясини айблаган. Уларнинг фикрича, дарахтлар Sulpak дўконининг олд қисми йўлдан яхшироқ кўриниб туриши учун кесилган.

Компаниянинг ўзи дарахтлар кесилган жой Sulpak’га қарашли эмаслигини билдириб, бу айбловларни рад этган. Шунингдек, ҳолат юзасидан полицияга мурожаат қилингани айтилган.

Кейинчалик Олмаота ҳокимлиги дарахтлар Sulpak пудратчилари томонидан йўқ қилинганини аниқлаган. Ҳокимлик маълумотларига кўра, 13 та дарахт: 9 та эман ва 4 та қайин дарахти кесиб ташланган.

«Олмаота Экологик жамияти» Facebook’даги саҳифасида шаҳарда ноқонуний дарахт кесиш ҳолатлари  «доимий ва оммавий равишда» содир бўлишини маълум қилган.

«Кесишда айбдорлар одатда майда жарималар ёки компенсация сифатида кесилган дарахт  нархига тенг бўлмаган дарахтлар экиш билан қутулади ёки умуман ҳеч нарса экмайди. Мамлакат қонунчилигининг номукаммаллиги деярли исталган кишига экологик қонунбузарлик содир этиш имконини беради», — деб ёзган ушбу саҳифа аъзоларидан бири.

Ўзбекистонда ҳам дарахтларнинг ноқонуний кесилиши билан боғлиқ ҳолатлар давом этмоқда. Хусусан, шу кунларда «Туркистон» саройи атрофидаги дарахтларга белги қўйилгани ва улар кесилиши мумкинлиги ҳақидаги хабарлар ижтимоий тармоқларда кенг муҳокамаларга сабаб бўлган эди. Давлат экология қўмитаси белги қўйилган дарахтлар имкон қадар кесилмаслигини, ўсимлик зараркунандалари ва табиий омиллар таъсирида зарарланган, турли коммуникацияларга таҳдид солаётган дарахтларга махсус белги қўйилганини маълум қилган.

7 ноябрь куни ижтимоий тармоқларда Чилонзор туманидаги Гагарин кўчасида жойлашган дарахтларнинг ноқонуний кесилиш ҳолати бўйича жойлаштирилган пост юзасидан олиб борилган ўрганиш ишларида бир дона чинор дарахти ноқонуний кесилгани аниқланганди. Ўсимлик дунёсига келтирилган зарар 42,9 миллион сўмни ташкил этган.