Самарқандлик эркак савдо марказларининг бирида рашк сабаб хотини ва унинг ўйнаши дея тахмин қилинган шахсни пичоқлаб қўйди, деб хабар беради Telegram’даги STV канали. Бош прокуратура матбуот котиби ушбу ҳолат ростан ҳам содир бўлганини тасдиқлади.
Кўнгилсиз ҳодиса 20 ноябрь куни соат тахминан 18:00 ларда Мирзо Улуғбек кўчасида жойлашган савдо марказида содир бўлган. 42 ёшли пастдарғомлик эркак дўконда турмуш ўртоғи ва унинг ўйнаши дея тахмин қилинган шахсга дуч келган ва одамлар орасида уларга пичоқ билан ташланган. Таъкидланишича, жабрланувчилар қон кетиши оқибатида воқеа жойида вафот этган.
Бош прокуратуранинг маълум қилишича, гумонланувчи қотиллик факти бўйича қўлга олинган, Самарқанд прокуратураси Жиноят кодексининг 97-модда 2-қисми «а, ж» бандлари бўйича жиноят ишини қўзғатган. Тергов ҳаракатлари олиб борилмоқда.
Аввалроқ Жиззахда қиз ўз онасини пичоқлаб ўлдириб қўйгани, шунингдек, Юқори Чирчиқда ўз акасини дўппослаб, пичоқлаган шахс қўлга олингани тўғрисида хабар берилганди.
Изоҳ (0)