Криштиану Роналду «Реал Мадрид»ни тарк этганидан кейин, шубҳасиз, Серхио Рамос жамоанинг асосий юлдузи ва юзига айланди. У нафақат ҳимояда қўрғон вазифасини бажаради, балки жамоанинг тўпурарига ҳам айлана олди. Совринлар ва рекордлар борасида эса унга нафақат Мадридда, балки бутун дунёда ҳам тенг келадиганлар сони унчалик кўп эмас. Исталган футбол юлдузи билан бўлгани сингари, Рамоснинг ҳам яшаш тарзи, қандай машиналарда юриши, уйлари кўпчиликни қизиқтириши бор гап. Демак, қуйида Серхио Рамоснинг қандай ҳаёт кечириши ҳақида ҳикоя қилишга ҳаракат қиламиз.
Қаерда яшайди?
Рамос ва унинг оиласи бир неча йил олдин янги уйга кўчиб ўтган ва ҳозир у жамоадошларидан узоқроқда яшайди. Серхио ва унинг рафиқаси 2017 йилда Мадриднинг ҳашаматли ҳудудларидан бири Ла Моралехага кўчиб ўтади, чунки оила учинчи фарзандини кутаётганди.
Уй шундоққина соҳил бўйида жойлашган бўлиб, у уч қаватдан ташкил топган. Унда иккита сузиш ҳавзаси бор (бири қиш мавсуми учун мўлжалланган, иккинчиси эса очиқ ҳавода жойлашган. Бино майдони 1470 квадрат метрни ташкил этади. Испан матбуоти ушбу ҳашаматли сарой футболчига 3 миллион еврога тушганини ёзади. Шунингдек, ҳовузлардан ташқари, уйда кенг хоналар, билярд ва ошхона мавжуд. 2017 йилгача Серхио «Реал»нинг кўплаб футболчилари сингари Ла Финча турар жой мажмуасида яшарди. У ерда Рамос Криштиану Роналду билан қўшни бўлган.
Қандай машиналарда юради?
Рамоснинг гаражи чиройли автомобиллар билан тўла.
Унинг автопаркида Mercedes AMG 63 (190 минг доллар), Audi R8 Spider (160 минг доллар), Porsche 911 Carrera S 185 минг доллар, Aston Martin DBS (230 минг доллар), Fiat 600 (совға қилинган) сингари дунёга машҳур «тойчоқ»ларни кўриш мумкин.
Рамоснинг оиласи
Рамоснинг рафиқаси ундан 8 ёшга катта, бироқ бу уларнинг муносабатларига ҳеч қандай таъсир ўтказмайди. Унинг исми Пилар Рубио, улар уч фарзандли бўлишига қарамай, тўй маросими 2019 йилнинг 15 июнида бўлиб ўтган. Ушбу тадбир учун футболчининг 1 миллион евро тўлагани айтилади. Ҳозирги кунда Пилар Испаниянинг энг муваффақиятли журналистларидан бири ҳисобланади. Жуфтлик тўрт нафар фарзандни вояга етказмоқда
Рамоснинг дўстлари ким?
Майдонда ҳеч кимни аямайдиган Рамос унинг ташқарисида анчагина хушчақчақ ва киришимли йигит. Рамоснинг миллионлар оламидаги энг яқин дўстларидан бири Дэвид Бекҳэм бўлиб, Серхио айнан у ва оиласини тўйига чақирган. Криштиану Роналду эса ушбу маросимдан четда қолган.
Ажабланарлиси шундаки, Рамоснинг яна бир дўсти Херар Пике ҳисобланади («Эль-Класико»ларда улар ўртасида ҳақиқий жанг бўлади). Интервьюлардан бирида Серхио Пике билан дўстлиги йил сайин мустаҳкамланиб бораётганини ҳақида гапирганди.
«Қироллик клуби»да эса Рамос асосан, Лука Модрич билан кўп мулоқот қилади. Хорват билан улар нафақат майдонда, балки унинг ташқарисида ҳам вақт ўтказади ва оилавий таътилларга ҳам чиқиб туради.
Рамоснинг яна бир дўсти Кейлор Навас бўлиб, дарвозабон ПСЖга ўтиб кетган бўлса-да, улар ҳамон қўнғироқлашиб туради.
Рамос футболдан ташқари нималарга қизиқади?
Майдонда том маънодаги безори каби ҳаракат қиладиган Рамосни бўш вақтларида денгиз ва сув ҳавзаларидан топиш мумкин. Шунингдек, у оиласи билан кўп вақт ўтказишни хуш кўради.
Рамоснинг даромади қанча?
Рамос унчалик қиммат трансфер нархига эга бўлмаса-да, у ҳозирда «Реал»нинг энг катта маош олувчи футболчилардан бири ҳисобланади. Серхио «қироллик клуби»да 2005 йилдан бери тўп суриб келади, шу вақт оралиғида унинг даромади ўн бараваргача ўсди. Унинг амалдаги шартномаси 2021 йилнинг 30 июнигача амал қилади (ҳозирда томонлар уни узайтириш бўйича музокаралар олиб бормоқда), футболчи эса йилига 12 миллион евро олади. Бундан ташқари, у турли хил брендларни реклама қилгани учун ҳам шартнома асосида еврода миллионлаб даромад кўради.
Изоҳ (0)