Krishtianu Ronaldu “Real Madrid”ni tark etganidan keyin, shubhasiz, Serxio Ramos jamoaning asosiy yulduzi va yuziga aylandi. U nafaqat himoyada qo‘rg‘on vazifasini bajaradi, balki jamoaning to‘purariga ham aylana oldi. Sovrinlar va rekordlar borasida esa unga nafaqat Madridda, balki butun dunyoda ham teng keladiganlar soni unchalik ko‘p emas. Istalgan futbol yulduzi bilan bo‘lgani singari, Ramosning ham yashash tarzi, qanday mashinalarda yurishi, uylari ko‘pchilikni qiziqtirishi bor gap. Demak, quyida Serxio Ramosning qanday hayot kechirishi haqida hikoya qilishga harakat qilamiz.
Qayerda yashaydi?
Ramos va uning oilasi bir necha yil oldin yangi uyga ko‘chib o‘tgan va hozir u jamoadoshlaridan uzoqroqda yashaydi. Serxio va uning rafiqasi 2017-yilda Madridning hashamatli hududlaridan biri La Moralexaga ko‘chib o‘tadi, chunki oila uchinchi farzandini kutayotgandi.
Uy shundoqqina sohil bo‘yida joylashgan bo‘lib, u uch qavatdan tashkil topgan. Unda ikkita suzish havzasi bor (biri qish mavsumi uchun mo‘ljallangan, ikkinchisi esa ochiq havoda joylashgan. Bino maydoni 1470 kvadrat metrni tashkil etadi. Ispan matbuoti ushbu hashamatli saroy futbolchiga 3 million yevroga tushganini yozadi. Shuningdek, hovuzlardan tashqari, uyda keng xonalar, bilyard va oshxona mavjud. 2017-yilgacha Serxio “Real”ning ko‘plab futbolchilari singari La Fincha turar joy majmuasida yashardi. U yerda Ramos Krishtianu Ronaldu bilan qo‘shni bo‘lgan.
Qanday mashinalarda yuradi?
Ramosning garaji chiroyli avtomobillar bilan to‘la.
Uning avtoparkida Mercedes AMG 63 (190 ming dollar), Audi R8 Spider (160 ming dollar), Porsche 911 Carrera S 185 ming dollar, Aston Martin DBS (230 ming dollar), Fiat 600 (sovg‘a qilingan) singari dunyoga mashhur “toychoq”larni ko‘rish mumkin.
Ramosning oilasi
Ramosning rafiqasi undan 8 yoshga katta, biroq bu ularning munosabatlariga hech qanday ta’sir o‘tkazmaydi. Uning ismi Pilar Rubio, ular uch farzandli bo‘lishiga qaramay, to‘y marosimi 2019-yilning 15-iyunida bo‘lib o‘tgan. Ushbu tadbir uchun futbolchining 1 million yevro to‘lagani aytiladi. Hozirgi kunda Pilar Ispaniyaning eng muvaffaqiyatli jurnalistlaridan biri hisoblanadi. Juftlik to‘rt nafar farzandni voyaga yetkazmoqda
Ramosning do‘stlari kim?
Maydonda hech kimni ayamaydigan Ramos uning tashqarisida anchagina xushchaqchaq va kirishimli yigit. Ramosning millionlar olamidagi eng yaqin do‘stlaridan biri Devid Bekhem bo‘lib, Serxio aynan u va oilasini to‘yiga chaqirgan. Krishtianu Ronaldu esa ushbu marosimdan chetda qolgan.
Ajablanarlisi shundaki, Ramosning yana bir do‘sti Xerar Pike hisoblanadi (“El-Klasiko”larda ular o‘rtasida haqiqiy jang bo‘ladi). Intervyulardan birida Serxio Pike bilan do‘stligi yil sayin mustahkamlanib borayotganini haqida gapirgandi.
“Qirollik klubi”da esa Ramos asosan, Luka Modrich bilan ko‘p muloqot qiladi. Xorvat bilan ular nafaqat maydonda, balki uning tashqarisida ham vaqt o‘tkazadi va oilaviy ta’tillarga ham chiqib turadi.
Ramosning yana bir do‘sti Keylor Navas bo‘lib, darvozabon PSJga o‘tib ketgan bo‘lsa-da, ular hamon qo‘ng‘iroqlashib turadi.
Ramos futboldan tashqari nimalarga qiziqadi?
Maydonda tom ma’nodagi bezori kabi harakat qiladigan Ramosni bo‘sh vaqtlarida dengiz va suv havzalaridan topish mumkin. Shuningdek, u oilasi bilan ko‘p vaqt o‘tkazishni xush ko‘radi.
Ramosning daromadi qancha?
Ramos unchalik qimmat transfer narxiga ega bo‘lmasa-da, u hozirda “Real”ning eng katta maosh oluvchi futbolchilardan biri hisoblanadi. Serxio “qirollik klubi”da 2005-yildan beri to‘p surib keladi, shu vaqt oralig‘ida uning daromadi o‘n baravargacha o‘sdi. Uning amaldagi shartnomasi 2021-yilning 30-iyunigacha amal qiladi (hozirda tomonlar uni uzaytirish bo‘yicha muzokaralar olib bormoqda), futbolchi esa yiliga 12 million yevro oladi. Bundan tashqari, u turli xil brendlarni reklama qilgani uchun ham shartnoma asosida yevroda millionlab daromad ko‘radi.
Izoh (0)