Фарғона вилоятида интернет орқали танишган қизи унга турмушга чиқмаслигини айтгани учун унинг уйига бориб, оила аъзоси ва қизни пичоқлаб, уйидаги чақалоқни ўлдирган йигит қўлга олинди. Бу ҳақда «Севимли» телеканалининг «Zamon.uz» кўрсатувида хабар қилинди.

Маълум қилинишича, Фуқаро Муҳаммадюсуф Маҳаммаджонов Instagram ижтимоий тармоғи орқали танишиб, бир неча маротаба учрашиб, ёқтириб қолган ва уйланмоқчи бўлган фуқаро Пирматова 2020 йил 26 май куни унга турмушга чиқиш фикридан қайтганини айтади.

Шундан сўнг Маҳаммаджонов 2020 йил 27 май куни соат 11:00 ларда қиздан ўч олиш мақсадида Фарғона шаҳрига келиб, унинг хонадонига эшик очиқлигидан фойдаланиб кириб олгач хонадон келинининг қорнига пичоқ билан зарба бериб оғир шикаст етказади.

Шундан сўнг йигит жабрланувчини ётоқхонага олиб кириб, яна бақирса ёки бошқа ҳаракатлар қилса, пичоқ билан яна жароҳатланишини айтиб қўрқитади.

Кейин хонадон келини Каримова телефон орқали қизни уйга чақиради. Қиз уйга келгунга қадар Каримованинг 2020 йил 5 март куни туғилган 2 ойлик чақалоқни уйнинг меҳмонхонасига олиб кириб, йиғисидан тўхтата олмагани сабабли уни ёстиқ билан димиқтириб қасддан ўлдиради.

Пирматова хонадонга етиб келганида йигит унинг юзага уриб, пичоқ билан қорин ва кўкрак қисмига ураётганида қўшниси Ибрагимов эшикни тақиллатиб, милиция чақиришини айтади. Шундан сўнг Маҳаммаджонов уйдан чиқиб, автомашина ювиш шохобчасида юз-қўлини ювиб, таксида Андижонга қайтиб кетади.

Муҳаммадюсуф Маҳаммаджонов Жиноят кодексининг 97-моддаси 2-қисми «в», «ж», «о» (бошқа бирор жиноятни яшириш ёки унинг содир этилишини осонлаштириш мақсадида ўта шафқатсизлик билан айбдорга аён бўлган ожиз аҳволдаги шахсни қасддан ўлдириш) бандлари 25-97-моддаси 2-қисми «р» банди ва 104-моддаси 1-қисми (қасддан баданга оғир шикаст етказиш) билан айбдор деб топилди. Жиноят ишлари бўйича Фарғона вилояти судида унинг иши кўриб чиқилди. Суд ҳукмига кўра, фуқаро Маҳаммаджоновга нисбатан 20 йил муддатга озодликдан маҳрум қилиш жазоси тайинланди.

Аввалроқ Бухорода ўғрилик қилишига халал берган 13 ёшли қизни болға билан уриб ўлдиришга уринган аёл қўлга олингани, Тошкентда автосаройлардан бирида чиптачи автобус ҳайдовчисига пичоқ тиқиб олгани ҳамда Наманганда 16 ёшли бола севган қизига SMS юборгани учун ўзидан бир ёш катта болани пичоқлаб ўлдириб қўйгани ҳақида хабар берилганди.