Ноябрь ойининг охирларида Ер сайёраси ёнидан диаметри 370-820 метр атрофида бўлган потенциал хавфли астероид учиб ўтади. Бу ҳақда NASA’нинг Ер атрофидаги объектларни ўрганиш марказига таяниб, «РБК» хабар берди.
153201 (2000 WО107) астероид Ерга 29 ноябрь куни яқинлашади. Space Reference маълумотларига кўра, мазкур осмон жисми ва Ер ўртасидаги масофа 4 миллион километрдан ортиқроқни ташкил этади. Таққослаш учун Ой ва Ер орасидаги масофа бундан ўн баробарга кам. Астероид ер шари орбитасини кесиб ўтгани учун потенциал хавфли ҳисобланади.
Спектр таҳлилларга кўра, астероид никель, темир ва кобалтдан таркиб топган. Asterank маълумотлар базасининг баҳолашича, астероиддаги қиммабаҳо минералларнинг қиймати 17,4 миллиард долларни ташкил этади.
Аввалроқ Апофис астероиди тезлигини ошириб, Ерга яқинлашаётгани, улкан осмон жисми 48 йилдан сўнг сайёрга келиб урилиши мумкинлиги тўғрисида хабар берилганди.
Эслатиб ўтамиз, август охирларида NASA кўп қаватли уй катталигидек астероид Ерга яқинлашаётганидан огоҳлантирганди.
Изоҳ (0)