Россиянинг Якутск шаҳри мэри маъмурият биносини сотишга қарор қилди

Россиянинг Якутск шаҳри раҳбари Сардана Авксентьева мэрия биносини сотиш ниятини маълум қилди, деб ёзади «Gazeta.uz». «Ортиқча нарсаларнинг барчасидан қутулишда давом этамиз. Шаҳар бюджетини тўлдириш учун жуда зарур бўлган янги манбалар», — деб ёзган у ўз Facebook’ида.

«Мэрия биносини сотишга тайёрлашни бошлаймиз. Дастлаб шоҳкўчадаги, сал кейинроқ — Октябрь ва Гоголь кўчаларидаги. Шаҳар мулкини сотиш — қатъий белгилаб қўйилган жараён. Манфаатдор бўлган потенциал харидорлар бор, аммо барчасига риоя қилган ҳолда, очиқ ўтказиш керак. Акс ҳолда шубҳа қилишни бошлашади ва мен ўз дўстларим ёки қариндошларимга ‘арзонга’ сотганимни айтишади», — дея қайд этди мэр.

«Менинг фикримча, шаҳар мансабдорлари шаҳарнинг қоқ марказидаги қимматбаҳо бинода ўтириши шарт эмас. Биз арзон бино қуриб, у ерга кўчиб ўтишга тайёрмиз. Масалан, менинг биринчи ўринбосарим 17-даҳага кўчишни таклиф қилмоқда. Буни қўллаб-қувватлайман», — деб ёзди Сардана Авксентьева.

«Бино янги форматда, ҳар битта мансабдор биттадан кириб яшириниб оладиган кўп сонли кабинетлари йўқ. Ҳамма бир-бирини кўриб туриши мумкин бўлган битта хона. Аҳолининг қулайлиги учун марказда битта фронт-офис ташкил қиламиз», — дея аниқлик киритди шаҳар раҳбари.

Бундан ташқари, унинг сўзларига кўра, мэрия тез орада хизмат мақсадларида таксида юриш дастурини синовдан ўтказишни бошлайди.

«Автотранспорт билан таъминлаш қимматга тушади. Масалан, Москвада автотранспорт хизматидан йил бошидаёқ воз кечганмиз. Хизмат сафарларида ҳаммамиз бемалол метрода юрамиз, баъзи ҳолатларда таксидан фойдаланамиз», — деди у.

Сардана Авксентьева 2018 йилда Якутск тарихида мэр лавозимини эгаллаган биринчи аёлга айланди. Унинг ғалабаси сиёсий сенсация деб аталди. Сайланганидан кейин у шаҳар аппаратига ва хизмат автомобилларига харажатларни қисқартира бошлади, ноинсоф мансабдорлар ва пудратчиларни ишдан бўшатди.

Сардана Авксентьева интернетда жуда машҳур, унинг ўзи ижтимоий тармоқларда ёзиб, аҳоли билан учрашувлар ҳақида гапириб беради, шаҳарни ривожлантириш ва унинг муаммоларини ҳал қилиш режалари билан бўлишади.