Сенегалда (Ғарбий Африкада жойлашган) 200 га яқин киши номаълум касалликка чалинди, улар очиқ океанда уни юқтириб олгани тахмин қилинмоқда, деб ёзади «РБК».
«Аввал беморлар 82 киши эди, аммо кейинроқ камида 200 киши унга чалингани ҳақида хабар беришди», — деди мамлакат пойтахти жойлашган вилоят губернатори Ҳасан Сал.
Ҳукумат маълумотларига кўра, касалликни юқтириб олганларнинг барчаси Атлантика океанининг битта жойида балиқ овлаган. Касалланганлар пайдо бўлгач, ушбу ҳудудда балиқ овлаш вақтинчалик тақиқланди, таҳлил учун сувдан намуналар олинади.
Сенегалнинг Sud Quotidien газетаси маълумотларига кўра, беморларда қасмоқ тошиб, бутун бадани ва кўзлари қичишади. Яна бир нашр Le Soleil ёзишича, жабрланган балиқчилар таналарининг океан сувига тегган қисмлари энг кўп зарарланганини айтмоқда.
Шундай симптомларга эга беморларнинг барчаси қирғоқ бўйида жойлашган Рюфикс шаҳрида изоляция қилинмоқда. У океаннинг хавфли эканлиги тахмин этилаётган ҳудудига яқин жойлашган. Касалланганлар учун шаҳар стадиони ажратилди.
Сентябрь охирида Россиянинг Камчатка ярим ороли аҳолиси денгиз жониворлари ёппасига қирғоққа чиқиб қолиб, ҳалок бўлаётгани ҳақида хабар берганди. Кроноцкий қўриқхонаси ходимлари ифлосланган акваторияда 10—15 метр чуқурликдаги сувости организмларининг 90 фоиздан ортиғи ҳалок бўлган, деган хулосага келганди. Маҳаллий сёрферлар ҳам сувда сузгандан кейин кўзлари ачишгани ва кўнгил айнигани ҳақида шикоят қилган.
Ҳодисанинг аниқ сабабини аниқлаб бўлмади, текширувлар натижасида нефть маҳсулотлари сизиб чиққани ёки ракета ёқилғиси қолдиқлари тушиб қолгани аниқланмади, жабрланганларда эса заҳарланиш қайд этилмади. Асосий версияга кўра, бунга табиий ҳодисалар, заҳарли сув ўтлари сабаб бўлган бўлиши мумкин.
Мавзуга доир: Камчаткадаги экологик инқироз — суратларда
Изоҳ (0)