Ўзбекистон Мудофаа вазирлиги ҳарбий қисмларида икки босқичда йиғинлар ташкил этилади
Шавкат Мирзиёевнинг Мудофаа вазирлиги ҳарбий қисмларида 2020 йилда давлат бошқаруви органлари, маҳаллий давлат ҳокимияти органлари, хўжалик бирлашмалари ва бошқа ташкилотлар раҳбарлари таркиби билан йиғинлар ўтказиш тўғрисидаги фармойиши лойиҳаси эълон қилинди.
2020 йилнинг ноябрь ва декабрь ойларида икки босқичда:
- биринчи босқич – Ўзбекистон мудофаа вазири раҳбарлигида 2020 йилнинг 24 ноябридан 28 ноябригача Тошкент вилоятининг «Чирчиқ» округ полигони базасида давлат бошқаруви органлари, хўжалик бирлашмалари ва бошқа ташкилотлар раҳбарлари таркиби билан;
- иккинчи босқич – ҳарбий округ қўшинлари қўмондонлари раҳбарлигида 2020 йилнинг 15 декабридан 19 декабригача ҳудудийлик тамойили асосида Мудофаа вазирлиги округ полигонлари базасида маҳаллий давлат ҳокимияти органлари, ҳудудий давлат бошқаруви органлари ва бошқа ташкилотлар раҳбарлари таркиби билан йиғинлар ташкил этилади.
Соғлиқни сақлаш вазирлиги Санитария-эпидемиологик осойишталик ва жамоат саломатлиги хизмати билан ҳамкорликда йиғинларни ўтказиш жараёнида санитария-эпидемиологик хавфсизлиги талабларини таъминлаш ва йиғинлар қатнашчиларининг саломатлигини сақлаш юзасидан зарур чоралар кўрилади.
Давлат бошқаруви органлари, маҳаллий давлат ҳокимияти органлари, хўжалик бирлашмалари ва бошқа ташкилотлар раҳбарлари:
а) 2020 йил 14 ноябрга қадар йиғин қатнашчиларининг белгиланган тартибда тиббий кўрикдан ўтказилишини таъминлайди;
б) 2020 йил 20 ноябрга қадар йиғин қатнашчиларининг (йиғинларга рухсат этилган шахсларнинг) аниқ рўйхатини тузади ва уларни Мудофаа вазирлигига юборади;
в) қуйидагилар:
- биринчи босқич йиғин қатнашчиларининг 2020 йил 24 ноябрь куни соат 9:00 га қадар Тошкент шаҳар мудофаа ишлари бошқармасининг шаҳар йиғин пунктига;
- иккинчи босқич йиғин қатнашчиларининг 2020 йил 15 декабрь куни соат 9:00 га қадар Қорақалпоғистон, вилоятлар ва Тошкент шаҳар мудофаа ишлари бошқармалари йиғин пунктларига етиб келишини таъминлайди.
