Bonhams аукциони орқали Жеймс Бонд ҳақидаги фильмларда суратга тушган ноёб автомобиль сотувга қўйилди. «Жосус 007» одатда Aston Martin машиналарида ҳаракатланган, бироқ бу сафар гап Mercury Coungar ХР-7 ҳақида кетмоқда, деб ёзади «Quto.ru».
Спорткар 1967 йилда ишлаб чиқарилган бўлиб, у франшизанинг «Ҳазрати олияларининг махфий хизматида» номли олтинчи фильмида суратга тушган. Жорж Лезенби ижросидаги Жеймс Бонд айнан шу автомобилда рафиқаси ҳамкорлигида йўловчилар билан ҳаракатланган. Фильмда Бонднинг рафиқаси ролини Даяна Ригг ижро этган.
Мазкур автомобилнинг Aston’лардан фарқи унга жосусларга хос ҳеч қандай гаджетлар ўрнатилмаганида. Кабриолетнинг ноодатий қўшимча опциялари қаторидан чанғилар учун юкхона ва чанғининг ўзи ўрин олган. Автомобиль 200 минг долларга баҳоланмоқда. Савдолар 16 декабрь куни бўлиб ўтади.
Аввалроқ 2002 йилда катта экран юзини кўрган «Ҳалок бўл, лекин ҳозир эмас» фильмида Жеймс Бонд ролини ижро этган актёр Пирс Броснан қандай қилиб Aston Martin’ни ўзига суперкар совға қилишга кўндирганини сўзлаб берганди.
Изоҳ (0)