2017 йилда Apple аккумуляторларнинг ейилишини компенсация қилиш мақсадида дастурий таъминот даражасида атайлаб унинг самарадорлигини пасайтираётгани маълум бўлганди. Бунинг натижасида катта можаро юзага келган бўлиб, у суд даъволари ва шикоятлари билан якунланган.
Вазиятга оид суриштирувга АҚШнинг 34 та штати қўшилган, бош прокурорлар судлар орқали компаниядан жарима тўлашни талаб қила бошлаган. The Washington Post’нинг ёзишича, афтидан, орадан уч йил ўтгач, суд иши охирига етмоқда — Apple масалани ҳал этиш учун 113 миллион доллар тўлашга тайёр бўлган.
Бу Apple’нинг самарадорлик ва аккумуляторларга боғлиқ иккинчи йирик тўлови ҳисобланади. 2020 йил бошида компания жамоавий даъво учун 500 миллион доллар ажратганди. Иштирокчиларнинг аксарияти 25 доллардан ва фақат АҚШдагилар олган. Компания сўнгги уч йил ичида турли жарималар учун жами 800 миллион долларга яқин маблағ сарфлаб юборган.
Apple 2017 йилнинг декабрида ростан ҳам смартфонларнинг ишлаш самарадорлигини пасайтираётганини тан олган — акс ҳолда аккумуляторлари ейилган моделлар тўсатдан ўчиб қолиши мумкин.
Охир-оқибат Apple фойдаланувчиларни огоҳлантирмагани учун кечирим сўраган ва аккумуляторларни алмаштириш бўйича дастурни ишга тушириб, унинг нархини 29 доллар этиб белгилаган. Компания iOS 11.3 версиясида фойдаланувчилар ўз батареяларининг ҳолатини кўришга имкон берадиган, шунингдек, ишчанлик қобилиятини пасайтириш функциясини ўчириб қўядиган янгиликни тақдим этган. 2018 йилда компания созламалар орқали аккумулятор сиғимининг реал ҳолатини кузатиш имкониятини қўшган.
Изоҳ (0)