2020 йил 16 ноябрь куни Варшава шаҳрида (Польша) Ўзбекистон Республикаси Ташқи ишлар вазири Абдулазиз Комилов Диний эркинликларни илгари суриш бўйича вазирлар конференциясида иштирок этиб, тадбир қатнашчиларига видеомурожаат йўллади. Бу ҳақда ТИВ ахборот хизмати хабар қилган.
Хабарда қайд этилишича, Ташқи ишлар вазири тадбир иштирокчиларини диний эркинликларни таъминлаш бўйича Ўзбекистон тажрибаси ва республикада мазкур йўналишдаги халқаро мажбуриятларини изчил бажараётгани ҳақида хабардор қилган.
Қисқа давр мобайнида эътиқод эркинлигини мустаҳкамлаш соҳасида республикада амалга оширилган аниқ чоралар, хусусан, халқаро ҳуқуқ нормалари ва энг яхши демократик стандартларни ҳисобга олган ҳолда янги таҳрирдаги «Виждон эркинлиги ва диний ташкилотлар тўғрисида»ги қонун лойиҳасининг ишлаб чиқилиши, диний бирлашмаларни давлат рўйхатидан ўтказиш жараёнининг соддалаштирилиши, мамлакат тарихида илк бор дин ва эътиқод эркинлиги таъминланиши мониторинги бўйича парламент эшитувининг ўтказилиши қайд этилган.
Шунингдек, Абдулазиз Комилов бағрикенглик маданиятини мустаҳкамлаш ҳамда таълим ва маърифатни фаол тарғиб қилиш жамиятда диний эркинлик ва миллатлараро тотувликни таъминлашнинг самарали йўлларидан бири эканлигини ҳам эътироф этган.
«Ўзбекистон ТИВ раҳбари мазкур форум инсоннинг эътиқод эркинлиги ҳуқуқини ҳимоя қилишни илгари суриш бўйича халқаро саъй-ҳаракатларни бирлаштириш ишида навбатдаги муваффақиятли қадам бўлишига ишонч билдирди», — дейилади вазирлик хабарида.
Аввал Абдулазиз Комилов бошчилигидаги Ўзбекистон делегацияси 15–22 ноябрь кунлари АҚШга ташриф буюриши хабар қилинганди.
Изоҳ (0)