Ўзбекистон мусулмонлари идораси тасарруфидаги олий ва ўрта махсус ислом таълим муассасаларида анъанавий ўқув жараёнлари 1-босқич талабалари учун 16 ноябрдан, юқори босқич талабалари учун 20 ноябрдан бошланиши белгиланди. Бу ҳақда Ўзбекистон мусулмонлари идораси матбуот хизмати хабар берди.
Маълум қилинишича, анъанавий дарслар бошланиши муносабати билан барча диний таълим муассасаларида ўқитувчи ва талабаларнинг карантин талабларига қатъий амал қилишлари таъминланади. Жумладан, педагог-ўқитувчилари COVID-19 касаллиги учун тест топширишлари ҳамда ўқув бинолари, талабалар турар жойлари, талабалар ошхоналари санитария-гигиена ва карантин талабларига мос ҳолда белгиланган тартибда дезинфекция қилиш ишлари амалга оширилган.
«Шунингдек, ҳар бир ўқув аудиторияларини етарли миқдорда антисептик воситалар билан таъминлаш, белгиланган тартибда ҳар куни дезинфекция қилиш, ўқув аудиторияларида ижтимоий масофани сақлаш, ўқув машғулотлари давомийлигини 60 дақиқадан ошмаслигини белгилаш ҳамда бир кунда уч жуфтликдан кўп ўқув машғулотлари ўтказилмаслик ва талабалар, педагог-ўқитувчи ва ходимларнинг тиббий ниқобда юришлари кераклиги каби бир қанча чора-тадбирлар жорий қилинди», — дейилади идора хабарида.
Эслатиб ўтамиз, Ўзбекистон олий таълим муассасаларида 2020/2021-ўқув йили 2 сентябрдан масофавий шаклда бошланганди. Сентябрь ойининг бошида Олий ва ўрта-махсус таълим вазирлиги матбуот котиби Фарҳод Бабашев Ўзбекистон ОТМларида анъанавий таълим шакли 2021 йилнинг январь—февраль ойларида иккинчи семестр бошланиш вақтида қайта тикланиши мумкинлигини айтганди.
Республика комиссиясининг 2020 йил 12 ноябрдаги йиғилиши қарорига мувофиқ, барча олий таълим муассасаларида 2020 йилнинг 16 ноябридан олий таълим муассасаси томонидан ишлаб чиқилган чора-тадбирлар ва режа-график асосида ўқув жараёнини анъанавий шаклда давом эттириш белгиланди.
Изоҳ (0)