Режиссёр Квентин Тарантино HarperCollins нашриёт компанияси билан шартнома имзолади. Унга кўра, режиссёр томонидан иккита китоб тақдим қилиниши кўзда тутилган, деб ёзади «Кинопоиск».
Биринчи китоб «Бир куни Голивудда» фильмининг новеллизацияси бўлади. Унда Тарантино Леонардо Ди Каприо ва Бредд Питт ижро қилган бош қаҳрамонлар, актёр Рик Далтон ва унинг дублёри Клифф Бут ҳақида батафсил ҳикоя қилиб, фильмга киритилмаган эпизодларни тасвирлаб беради. Уларнинг бир қисми Далтоннинг Италияда карьера қилишга уринганига бағишланади. Deadline нашрининг ёзишича, актёр Берт Рейнольдс китоб қаҳрамонларидан бири бўлади.
Шунингдек, HarperCollins режиссёрнинг «Cinema Speculation» деб номланган тўпламини ҳам тақдим қилади. Ундан 1970 йиллар кинематографиясига бағишланган эссе ва тақризлар ўрин олади.
«Бир куни Голливудда» новеллизацияси 2021 йилнинг ёзида тақдим қилинади. Иккинчи китобнинг қачон тақдим қилиниши эса ҳали номаълум.
Аввалроқ Тарантино «Бир куни Голливудда» фильми сюжетида келтирилган «Овчилик қонуни» деб номланган мини-сериални суратга олишни истаётганини маълум қилган ва баъзи эпизодлар сценарийси тайёрлигини билдирган. Шунингдек, у 1950 йилларда Голливуд киносидан ҳафсаласи пир бўлиб, Акира Куросава ва Федерико Феллинининг фильмларини томоша қилишни бошлаган Иккинчи жаҳон уруши ветеранлари ҳақида песа ва китоб ёзишни режалаштирган.
Маълумот учун, 2019 йил экран юзини кўрган «Бир куни Голливудда» фильми кинопрокатда 372 миллион доллар йиғган ва икки карра «Оскар» мукофотига лойиқ, деб топилган.
Изоҳ (0)