Rejissor Kventin Tarantino HarperCollins nashriyot kompaniyasi bilan shartnoma imzoladi. Unga ko‘ra, rejissor tomonidan ikkita kitob taqdim qilinishi ko‘zda tutilgan, deb yozadi “Kinopoisk”.
Birinchi kitob “Bir kuni Golivudda” filmining novellizatsiyasi bo‘ladi. Unda Tarantino Leonardo Di Kaprio va Bredd Pitt ijro qilgan bosh qahramonlar, aktyor Rik Dalton va uning dublyori Kliff But haqida batafsil hikoya qilib, filmga kiritilmagan epizodlarni tasvirlab beradi. Ularning bir qismi Daltonning Italiyada karyera qilishga uringaniga bag‘ishlanadi. Deadline nashrining yozishicha, aktyor Bert Reynolds kitob qahramonlaridan biri bo‘ladi.
Shuningdek, HarperCollins rejissorning “Cinema Speculation” deb nomlangan to‘plamini ham taqdim qiladi. Undan 1970-yillar kinematografiyasiga bag‘ishlangan esse va taqrizlar o‘rin oladi.
“Bir kuni Gollivudda” novellizatsiyasi 2021-yilning yozida taqdim qilinadi. Ikkinchi kitobning qachon taqdim qilinishi esa hali noma’lum.
Avvalroq Tarantino “Bir kuni Gollivudda” filmi syujetida keltirilgan “Ovchilik qonuni” deb nomlangan mini-serialni suratga olishni istayotganini ma’lum qilgan va ba’zi epizodlar ssenariysi tayyorligini bildirgan. Shuningdek, u 1950-yillarda Gollivud kinosidan hafsalasi pir bo‘lib, Akira Kurosava va Federiko Fellinining filmlarini tomosha qilishni boshlagan Ikkinchi jahon urushi veteranlari haqida pyesa va kitob yozishni rejalashtirgan.
Ma’lumot uchun, 2019-yil ekran yuzini ko‘rgan “Bir kuni Gollivudda” filmi kinoprokatda 372 million dollar yig‘gan va ikki karra “Oskar” mukofotiga loyiq, deb topilgan.
Izoh (0)