Ўзбекистон Президенти матбуот хизмати 17 ноябрь куни 89 та муассасада 17 500 та ўрин COVID-19 билан касалланганлар учун ажратилган бўлиб, ҳозирда ушбу ўринларда 6570 нафар бемор даволанаётгани ҳақида хабар берди.
Фото: «Дарё»
Мазкур хабардан кейин бир қатор ОАВлар, шу жумладан, «Дарё» мазкур маълумот Соғлиқни сақлаш вазирлиги статистикасига мос келмаётганига эътибор қаратди. Вазирликнинг маълумотларига кўра, 17 ноябрь соат 19:00 ҳолатига кўра, мамлакатда 2123 нафар бемор коронавирусдан даволанмоқда.
Мазкур хабарлардан кейин Соғлиқни сақлаш вазирлиги ўз изоҳини берди. Унга кўра, «6570 нафар бемор орасида ўткир респиратор касалликлари, коронавирусга гумон қилинган ва оғир турдаги пневмония, шунингдек, вирус тасдиқланмаган беморлар ҳам бор».
«Коронавирус билан боғлиқ статистикага фақат махсус лаборатор тиббий текширувлар орқали касаллиги тасдиқланган беморларгина киритилади», — дейилади ССВ изоҳида.
Вазирликнинг билдиришича, касалликнинг айрим симптомлари мавжуд бўлиб, касаллик гумон қилинган, лекин инфекция тасдиқланмаган, шунингдек, пневмонияга чалинган ёки унга ҳам гумон қилинган беморлар коронавирус билан боғлиқ умумий расмий статистикада ҳисобга олинмайди. «Аммо юқумли касалликларга ихтисослашган ва юртимизнинг қатор ҳудудларида ташкил этилган саралаш ва тақсимлаш марказларида бундай беморлар ҳам стационар шароитда даволанишлари учун зарур шароитлар муҳайё қилинган. Ҳозирда улар шундай масканларда даволанмоқда», — дейилади Соғлиқни сақлаш вазирлиги хабарида.
«Касаллик тасдиқланса, улар дарҳол расмий статистикада қайд этилади ва юқумли касалликлар шифохоналарига йўналтирилади. Шунинг учун коронавирус тасдиқланмаган, лекин бошқа касалликлардан даволанаётган беморлар ҳам жуда кўп. Шуларнинг ҳисобига шифохоналардаги беморлар сони коронавирусдан даволанаётган беморларнинг вазирлик эълон қилаётган расмий миқдоридан фарқли эканини кўриш мумкин», — дейилади вазирлик изоҳида.
