O‘zbekiston Prezidenti matbuot xizmati 17-noyabr kuni 89 ta muassasada 17 500 ta o‘rin COVID-19 bilan kasallanganlar uchun ajratilgan bo‘lib, hozirda ushbu o‘rinlarda 6570 nafar bemor davolanayotgani haqida xabar berdi.
Mazkur xabardan keyin bir qator OAVlar, shu jumladan, “Daryo” mazkur ma’lumot Sog‘liqni saqlash vazirligi statistikasiga mos kelmayotganiga e’tibor qaratdi. Vazirlikning ma’lumotlariga ko‘ra, 17-noyabr soat 19:00 holatiga ko‘ra, mamlakatda 2123 nafar bemor koronavirusdan davolanmoqda.
Mazkur xabarlardan keyin Sog‘liqni saqlash vazirligi o‘z izohini berdi. Unga ko‘ra, “6570 nafar bemor orasida o‘tkir respirator kasalliklari, koronavirusga gumon qilingan va og‘ir turdagi pnevmoniya, shuningdek, virus tasdiqlanmagan bemorlar ham bor”.
“Koronavirus bilan bog‘liq statistikaga faqat maxsus laborator tibbiy tekshiruvlar orqali kasalligi tasdiqlangan bemorlargina kiritiladi”, — deyiladi SSV izohida.
Vazirlikning bildirishicha, kasallikning ayrim simptomlari mavjud bo‘lib, kasallik gumon qilingan, lekin infeksiya tasdiqlanmagan, shuningdek, pnevmoniyaga chalingan yoki unga ham gumon qilingan bemorlar koronavirus bilan bog‘liq umumiy rasmiy statistikada hisobga olinmaydi. “Ammo yuqumli kasalliklarga ixtisoslashgan va yurtimizning qator hududlarida tashkil etilgan saralash va taqsimlash markazlarida bunday bemorlar ham statsionar sharoitda davolanishlari uchun zarur sharoitlar muhayyo qilingan. Hozirda ular shunday maskanlarda davolanmoqda”, — deyiladi Sog‘liqni saqlash vazirligi xabarida.
“Kasallik tasdiqlansa, ular darhol rasmiy statistikada qayd etiladi va yuqumli kasalliklar shifoxonalariga yo‘naltiriladi. Shuning uchun koronavirus tasdiqlanmagan, lekin boshqa kasalliklardan davolanayotgan bemorlar ham juda ko‘p. Shularning hisobiga shifoxonalardagi bemorlar soni koronavirusdan davolanayotgan bemorlarning vazirlik e’lon qilayotgan rasmiy miqdoridan farqli ekanini ko‘rish mumkin”, — deyiladi vazirlik izohida.
Izoh (0)