O‘zbekistonda 89 ta muassasada 17 500 ta o‘rin COVID-19 bilan kasallanganlar uchun ajratilgan bo‘lib, hozirda ushbu o‘rinlarda 6 570 nafar bemor davolanmoqda. Bu haqda Prezident matbuot xizmati ma’lum qildi.

Rasmiy axborotda COVID-19 bilan kasallanganlar uchun ajratilgan koyka-o‘rinlarda davolanayotgan bu 6 570 bemorning bari koronavirus infeksiyasini yuqtirib olganmi yoki yo‘q, bunga alohida aniqlik kiritilmagan, lekin axborotning o‘zi koronavirusga qarshi kurash mavzusida edi.

O‘zbekistonda koronavirus statistikani yuritishga mas’ul Sog‘liqni saqlash vazirligi (SSV) ma’lumotlariga ko‘ra, mamlakatda 17-noyabr soat 19:00 holatiga ko‘ra koronavirusga chalingan 2 123 nafar bemorga “shifokorlarimiz tomonidan belgilangan standartlar bo‘yicha davo choralari ko‘rilmoqda”.

Avvalroq Prezident Shavkat Mirziyoyev 17-noyabr kuni videoselektor yig‘ilishi o‘tkazgani, unda O‘zbekistonda koronavirusga chalingan bemorlar uchun ajratilgan koykalarning 62 foizi bo‘sh yotgani, bunga sarflanayotgan “ulkan mablag‘lar bekor” ketmasligi uchun xarajatlarni optimizatsiya qilish haqida topshiriq berilgani ma’lum bo‘lgandi.

Qayd etish joiz, oktabr oyida Korrupsiyaga qarshi kurashish agentligi rahbari Akmal Burhonov Samarqand viloyatida koronavirusga chalinganlar statistikasi 10 barobar kamaytirib ko‘rsatilgani, “hamma viloyatlarda ham shu ahvol” ekanini ta’kidlagan edi. Keyinroq Burhonovning ushbu bayonoti shov-shuvga aylangach, agentlikning o‘zi izoh bergan, SSV esa raddiya berib, koronavirus statistikasiga oid ma’lumotlarni yashirish yoki buzib ko‘rsatishdan manfaatdor emasligini navbatdagi marta ma’lum qilgan edi.

Shunga qaramay, SSV tomonidan yuritilayotgan koronavirus statistikasiga savollar ko‘p; vazirlik 22-sentabrdan boshlab koronavirusdan vafot etganlarga doir qo‘shimcha ma’lumotlarni berishni to‘xtatgan va buning sabablarini ochiqlamagan. Mamlakatda koronavirusga chalinganlar soni SSV statistikasidagi raqamlardagidan ko‘proq bo‘lishi mumkinligini vazirlik huzuridagi koronavirusga qarshi kurash shtabining bir necha a’zosi tan olgan.