Карманадаги «Мирзачорбоғ» қароргоҳи қайта тикланади
Бухоро амирларидан бири Сайид Абдулаҳадхоннинг Навоий вилояти Кармана туманида жойлашган ёзги қароргоҳи хароба ҳолга келиб қолгани ҳақида хабар тарқалганди. Маданият вазирлиги унга муносабат билдирди.
ОАВда тарқалган хабарларда Карманада жойлашган Бухоро амирининг қароргоҳи хароба ҳолга келиб қолгани айтилганди.
«Мирзачорбоғ» қароргоҳи Кармана тумани «Кўҳнақўрғон» МФЙ ҳудудида жойлашган. Маскан Бухоро амири Абдулаҳадхон томонидан 1900–1905 йилларда барпо этилган. Маданий мерос объекти таъмирталаб аҳволга келиб қолган, шу сабабли ҳам Маданият вазирлиги томонидан 2020 йилда маданий мерос объектларни таъмирлаш-тиклаш дастурига киритилган.
Вазирликнинг қайд этишича, ёдгорликка доир лойиҳа-смета ҳужжатлари ишлаб чиқилган. Ҳужжатлар 2020 йил 4 ноябрдаги йиғилиш баёни билан тасдиқланган ва вазирлик ҳузуридаги инженеринг компаниясига тақдим этилган.
Мавзуга доир: Бухородаги Хўжа Калон масжиди олдидаги ҳовуз тегишли рухсатсиз бузилгани ва таъмирлаш ишлари олиб борилгани маълум бўлди
«Маданий мерос объектларни таъмирлаш-тиклаш дастурига асосан, инженеринг компанияси томонидан бинонинг сақланган том қисмини қайта тиклаш, бузилиб кетган қисмини анъанавий усулда тўлиқ тиклаш, сув кетиш йўллари ва бино атрофидаги ҳимоя йўлакларини таъмирлаш ишларини бошлаш учун бир миллиард сўм ажратилиб, яқин кунларда тендер савдоларига қўйилиши режалаштирилган. Объектни 2021–2022 йилларда тўлиқ реставрация қилиш режалаштирилган», — дейилади Маданият вазирлигининг муносабатида.
Мавзуга доир: Навоийда 5 та объект ЮНЕСКО Бутунжаҳон маданий мероси ёдгорликлари рўйхатига киритилади
