Сирдарёда ҳайдовчининг телефонини олиб қўйган ЙПХ ходими лавозимидан озод этилди
Сирдарё вилоятида ҳайдовчи билан келиб чиққан келишмовчилик вақтида унинг телефонни олиб қўйган ЙПХ ходими ишдан бўшатилди, дея хабар бермоқда ЙХҲББ.
Маълум қилинишича, 2020 йил 21 октябрь куни ижтимоий тармоқларда «Сирдарёда ҳайдовчи ва ГАИ ходими ўртасидаги келишмовчилик видеоси тарқалди. Бунга кўра, ГАИ ходими ҳайдовчининг телефонини олиб қўйган. Сабаби эса номаълум» сарлавҳали видео тарқалган.
Унга кўра, Сирдарё вилояти ИИБ ЙҲХБ ЙПХ инспектори сафдор Б.Бобожонов 2020 йил 7 октябрь куни соат 15:40 ларда Сирдарё тумани ҳудудидан ўтган М-34 автомобиль йўлининг 90-километрида хизмат олиб бораётган вақтида товуш кучайтиргич (сирена) мосламасини ёқиб келганликда гумонланиб, Lacetti русумли транспорт воситасини тўхтатади.
Шу пайт ҳайдовчи ва ЙПХ инспектори ўртасида келишмовчилик келиб чиқиб, ҳолатга ҳайдовчининг яқинлари ҳам аралашади ва шахсий уяли алоқа воситаси ёрдамида тасвирга олади. Видеода сафдор Б.Бобожонов йигитларнинг ўзини тасвирга олишига қаршилик қилиб, уяли телефонларини олиб қўйганлиги акс этган.
Ўзбекистон ИИВ ЙҲХББ ахборот хизматининг маълум қилишича, мазкур ҳолат юзасидан ўтказилган хизмат текширувида Вазирлар Маҳкамасининг 2018 йил 1 декабрдаги 975-сон қарори билан тасдиқланган «Йўл-патруль хизмати ходимларининг йўл ҳаракати қатнашчилари билан ўзаро муносабатлари ҳамда махсус мосламалардан фойдаланиши тартиби тўғрисида»ги низом ҳамда ИИВнинг айрим меъёрий буйруқ талабларини бузганлиги учун Сирдарё вилояти ИИБ ЙҲХБ ЙПХО ЙПХ инспектори Б.Бобожонов эгаллаб турган лавозимидан озод этилиши бўйича хулоса қабул қилинди.
Аввалроқ Оҳангаронда тўхтатилган ҳайдовчига «масхарабозлик қилган» ЙПХ ходими лавозимидан озод қилингани ҳамда Навоийда ҳайдовчининг соқол қўйганига эътироз билдирган ЙПХ ходими устидан хизмат текшируви бошлангани ҳақида хабар берилганди.
