Битирувчиларнинг олий таълим муассасаларига кириш кўрсаткичлари бўйича энг катта ўсиш Наманган ва Хоразм вилоятларида кузатилди. Бу ҳақда халқ таълими вазири Шерзод Шерматов ўзининг Telegram каналида маълум қилди ва бошқа вилоятлар ҳам бу кўрсаткични қандай ошириши мумкинлигини тушунтирди.
«Ҳудудларда таълимни яхшилаш бўйича натижага эришиш учун энг яхши тандем: жамоани бирлаштира оладиган фидойи халқ таълими бошқармаси раҳбари ҳамда уни доим қўллаб-қувватлайдиган вилоят ҳокими», — деган ХТВ раҳбари.
Вазирнинг таъкидлашича, Наманган ва Хоразм вилоятларида шу каби тандем бўлгани сабабли бошқа ҳудудларга нисбатан мактаблар масаласига эътибор кучлироқ бўлиб келган. Шунинг учун ҳам, «Ўқитувчи ва мураббийлар куни» байрами арафасида қатор педагоглар билан бирга ушбу икки вилоят халқ таълими бошқармаси раҳбарлари «Содиқ хизматлари учун» медали билан тақдирланган.
Шерзод Шерматов битирувчиларнинг ОТМларга кириш кўрсаткичлари бўйича биринчи 5 талик ҳудудлар орасида энг катта ўсиш ҳам айнан Наманган ва Хоразмда кузатилганини қайд этган.
Жадвалдан кўринишича, Ўзбекистонда мактаб битирувчилари сони ўтган йилга қараганда 1,6 баробар ортган бўлса-да, ОТМга кирган битирувчилар сони 2,02 баробар ошган. Вазирнинг сўзларига кўра, ташқи омиллар деярли барча ҳудудга бир хил таъсир қилади (квоталарнинг ошиши, китоблар, ДТМ тестлари ва ҳ.к.).
«Лекин айнан шу икки ҳудудда кўрсаткичларнинг ўсиш суръати бошқа ҳудудларникидан анча юқори бўлганига Наманган вилоятининг ўрни ўтган йилдагига нисбатан 4 поғонага, Хоразмники эса 2 поғонага кўтарилган», — деган Шерзод Шерматов.
«Ушбу оддий мисолни ўзи Президентимиз томонидан вилоят халқ таълими бошқармаси раҳбарларини вилоят ҳокимининг маслаҳатчиси сифатида мавқейини кўтарилиши ҳамда ҳокимларга камида 30-40 фоиз вақтларини мактабларга ёрдамга сарфлашлари бўйича кўрсатма берилиши бежизга эмаслигини кўрсатмоқда», — деб қўшимча қилган у.
Вазирнинг айтишича, вилоят (туман) ҳокими халқ таълими бошқармаси (бўлими) раҳбарини ҳафтасига камида бир маротаба қабул қилиб, муаммоларини ечишда ёрдам берса, албатта, ўша ҳудудда таълим йўналишида ривожланиш бўлади. «Ҳоким томонидан эътибор берилмаса ёки вилоят (туман) халқ таълими раҳбари муаммоларни тўғри таҳлил қилиб ҳокимга тушунтира билмаса, жойларда ижобий ўзгариш бўлиши жуда қийин», — дейди ХТВ раҳбари.
Шерзод Шерматов, шунингдек, ОТМга умуман кирмаган мактаблар сони деярли 3 баробарга камайгани, бу бўйича алоҳида батафсил маълумот берилишини билдириб ўтган.
Изоҳ (0)