Buxoro amirlaridan biri Sayid Abdulahadxonning Navoiy viloyati Karmana tumanida joylashgan yozgi qarorgohi xaroba holga kelib qolgani haqida xabar tarqalgandi. Madaniyat vazirligi unga munosabat bildirdi.
OAVda tarqalgan xabarlarda Karmanada joylashgan Buxoro amirining qarorgohi xaroba holga kelib qolgani aytilgandi.
“Mirzachorbog‘” qarorgohi Karmana tumani “Ko‘hnaqo‘rg‘on” MFY hududida joylashgan. Maskan Buxoro amiri Abdulahadxon tomonidan 1900–1905-yillarda barpo etilgan. Madaniy meros obyekti ta’mirtalab ahvolga kelib qolgan, shu sababli ham Madaniyat vazirligi tomonidan 2020-yilda madaniy meros obyektlarni ta’mirlash-tiklash dasturiga kiritilgan.
Vazirlikning qayd etishicha, yodgorlikka doir loyiha-smeta hujjatlari ishlab chiqilgan. Hujjatlar 2020-yil 4-noyabrdagi yig‘ilish bayoni bilan tasdiqlangan va vazirlik huzuridagi injenering kompaniyasiga taqdim etilgan.
Mavzuga doir: Buxorodagi Xo‘ja Kalon masjidi oldidagi hovuz tegishli ruxsatsiz buzilgani va ta’mirlash ishlari olib borilgani ma’lum bo‘ldi
“Madaniy meros obyektlarni ta’mirlash-tiklash dasturiga asosan, injenering kompaniyasi tomonidan binoning saqlangan tom qismini qayta tiklash, buzilib ketgan qismini an’anaviy usulda to‘liq tiklash, suv ketish yo‘llari va bino atrofidagi himoya yo‘laklarini ta’mirlash ishlarini boshlash uchun bir milliard so‘m ajratilib, yaqin kunlarda tender savdolariga qo‘yilishi rejalashtirilgan. Obyektni 2021–2022-yillarda to‘liq restavratsiya qilish rejalashtirilgan”, — deyiladi Madaniyat vazirligining munosabatida.
Izoh (0)