Болливуд фахрланса арзийдиган Амир Хон ижросидаги 3 фильм

Болливуднинг энг кўзга кўринган юлдузларидан бири ҳисобланган, рол танлаш борасида перфексионист экани ва ижро этган фильмларида ижтимоий муаммолар акс этгани билан бошқалардан ажралиб турадиган Амир Хон арсеналида «Уч савдойи», «Жоним фидо», «Тезлик»дан ташқари яна бир қанча эсда қоларли фильмлар мавжуд. Қуйида номи келтирилган фильмларда эса актёрнинг ижро маҳоратига қойил қолса арзийди.

«Осмондаги юлдузчалар», 2007 йил

Одатда ҳинд фильмларида воқеалар ривожининг яхши томони кейин эса ёмон томони кўрсатилади. Мазкур фильмда эса ҳаммаси бошқача. Унинг биринчи ярмини томоша қилиш давомида томошабин ғамгин сюжетдан тушкунликка тушади. Бошқаларга ўхшамаган фильм қаҳрамони, яхши ўқимайди, тенгдошлари устидан кулади, ўқитувчилари тушунмайди. Ривожланишдан ортда қоляпти, деб ўйлаган ота-онаси болани интернат мактабга ўқишга юборади. Бу ерда ҳам бола ўзини ёлғиз ҳис қилади, лекин кунлардан бир куни янги расм ўқитувчисининг ишга келиши унинг ҳаётида туб бурилиш бўлади.

https://youtu.be/ubXO1UZCkVw

Айнан актёр Амир Хон ижросидаги қаҳрамон ўқитувчи боланинг ҳаётига ранг беради. У бошқалар сезмаган нарсага эътибор қаратиб, уни ота-онасининг нима учун бола бошқаларга ўхшамаслигини тушуниб етишига сабабчи бўлади.

«Пикей», 2014 йил

Актёр мазкур фильмда ерда қурилмасини йўқотиб қўйган ва уйга қайтишни истайдиган ўзга сайёралик ролини ижро қилган. Унга бу борада касби журналист бўлган қиз ёрдам беради. Пикей эса ўз навбатида қизга ёқтирган йигитини қайтаришга кўмаклашади.

https://www.youtube.com/watch?v=SOXWc32k4zA

Амир Хон ижро қилган қаҳрамон содда ва самимий бўлади, оқибати ҳаётий муаммолар келтириб чиқарадиган саволларни кўп беради.

«Дангал», 2016 йил

Ҳаётий воқеалик асосида суратга олинган фильмда актёр тўғрисўз, аммо камбағал спортчи ролини ижро қилади. У оиласини боқиш учун ноиложликдан спортни ташлашига тўғри келади ва ўзига ўзи ўғил фарзандли бўлса у албатта, жаҳон чемпиони бўлади, деб ваъда беради. Аммо оиласида бирин-кетин қиз фарзандлар дунёга келади.

https://youtu.be/xE89kXLjXHA

Унинг учинчи ва тўртинчи фарзанди ҳам қиз бўлади ва қизлар катта бўлганида оналар ўғилларини, қизлар урганини айтиб собиқ спортчи уйига шикоят қилиб кела бошлайди. Чўкаётган одам хасга ёпишади, деганларидек қаҳрамон хаёлига ажойиб нарса келади ва қўни-қўшниларнинг гап сўзига қарамай бир вақтлар қилган олтин медал орзуси сабаб қизлари билан шуғуллана бошлайди. Қойил қоладиган томони ушбу фильмда Амир Хон қаҳрамонининг 20, 30, 40 ва 50 ёшини ҳам ўзи ижро қилган. Қаҳрамонининг 20 яшар вақтини гавдалантириш учун вазн ташлаб, мушакларига ишлов берган, ёши ўтганидаги кўриниш учун эса 20 кило қўшимча вазн тўплаб, қорин қўйган.