O‘zbekiston Prezidenti 12-noyabr kuni Qashqadaryo viloyatiga qilgan tashrifi davomida Qarshi shahrida barpo etilgan IT-texnoparkda ham bo‘lib, yosh veb-dizaynerlar va dasturchilar bilan uchrashdi. Shavkat Mirziyoyev eng yaxshi davlat mobil ilovasini ishlab chiqish bo‘yicha O‘zbekiston oliy ta’lim muassasalari talabalari o‘rtasida o‘tkazilgan mGovAward tanlovida g‘oliblikni qo‘lga kiritgan qashqadaryolik yoshlardan tuzilgan jamoa vakillarini muvaffaqiyat bilan tabrikladi. “Daryo” muxbiri Mirolim Isajonov mazkur jamoa sardori, Qarshi shahridagi Global education o‘quv markazi rahbari Sardor Sodiqovni suhbatga chorladi.

Foto: Prezident matbuot xizmati

Ayni paytda Toshkent xalqaro Vestminster universitetida tahsil olayotgan Sardor Sodiqov uch yildan buyon Global education o‘quv markazini boshqarib keladi. Mazkur ta’lim muassasasi viloyatdagi eng katta bilim maskanlaridan biri hisoblanadi.

“Jamoamiz a’zolarining barchasini yoshlar tashkil etadi: hammasi turli oliy o‘quv yurtida o‘qiydi. Markazimiz rus, ingliz, koreys tillarida yigit-qizlarga dars beradi. Ko‘pchilikka ma’lum, pandemiya davrida mamlakatimizdagi o‘quv markazlar faoliyatini to‘xtatishga majbur bo‘ldi. Ammo bizning jamoa shijoatni tushirmay, anchadan beri o‘ylab yurgan rejalarimizdan birini amalga oshirishga erishdik. Ya’ni markazimiz qoshida video studiya ochib, ingliz tilidagi darslarni tasvirga tushirdik va ularni mobil ilova sifatida o‘quvchilarga yetkazishga kirishdik.

Foto: “Daryo”

Ilovamiz Play Market dasturida mavjud bo‘lib, til o‘rganish istagidagi hamma yoshdagilar uchun qulay va soddaligi bilan ajralib turadi. Bugungi kunga qadar mobil ilova foydalanuvchilari soni 5 ming nafarga yaqinni tashkil etadi. Ilovaga 40 dan ortiq darslarni kiritganmiz. Boshlang‘ich darslar bepul, so‘ngra har biri uchun to‘lov amalga oshiriladi. Barcha darslarni 60 ming so‘mga yuklab olish mumkin.

Ingliz tilini o‘rganishga qiziqishi borlarning hammasi ham har xil sabablar tufayli kunduzi repetitorga qatnashga vaqt topolmaydi. Ammo ushbu ilova orqali videolarni masofaviy tomosha qilib, turli shakldagi testlarni yechib, bilimni oshirish imkoniyati mavjud. Ham vaqt, ham mablag‘ tejaladi. Foydalanuvchilar soni kun sayin ortib borayotgani bizni cheksiz quvontirmoqda”, dedi Sardor Sodiqov.

Foto: Prezident matbuot xizmati

Yosh liderning ta’kidlashicha, Global education o‘quv markazi vakillari ushbu ilova bilan O‘zbekiston oliy ta’lim muassasalari talabalari o‘rtasida o‘tkazilgan mGovAward tanlovida qatnashib, g‘oliblikni qo‘lga kiritdi. Ular yaratgan chet tillarini masofaviy o‘qitish mobil ilovasini takomillashtirish uchun 500 million so‘m mukofot puli ajratildi.

“Mobil ilova ustida ishlayotgan paytimiz O‘zbekiston va BAA hukumati birgalikda o‘zbekistonlik yoshlar o‘rtasida tanlov o‘tkazayotganini eshitib qoldik va hujjat topshirdik. 260 dan ortiq loyiha ishtirok etgan mazkur onlayn tanlovda jamoamiz ham qatnashdi va eng yaxshi mobil ilova sifatida birinchi o‘ringa munosib ko‘rildi. Mukofot pulini ilovani yanada rivojlantirishga sarflaymiz”, — dedi tadbirkor.

Foto: “Daryo”

Prezident Shavkat Mirziyoyev IT-texnopark faoliyatini ko‘zdan kechirish jarayonida Sardor Sodiqov jamoasining loyihasi bilan ham tanishgan. Shuningdek, loyihani yanada rivojlantirish, yangi dasturiy mahsulotlar ishlab chiqish rejalarini qo‘llab-quvvatlash bo‘yicha mutasaddilarga ko‘rsatmalar bergan.

“Davlatimiz rahbariga dasturiy ilova haqida ma’lumot berdik va bu Prezidentimizga ma’qul keldi hamda tashabbuslarimiz va yangi g‘oyalarimizni qo‘llab-quvvatlashini bildirdi. Jamoamizning har bir a’zosiga, ya’ni 5 kishiga 5 ming dollardan mukofoti puli berilishini ta’kidladi. Bizga nisbatan bunday e’tibor yangi g‘oyalar va loyihalar ustida ishlashimizga kuch-quvvat berishi shubhasiz.

Foto: Prezident matbuot xizmati

Prezidentimiz oliy ta’lim muassasalari, ilmiy-tadqiqot institutlari va IT-parklar o‘rtasida hamkorlikni kengaytirish zarurligini aytdi. Bundan tashqari, jamoamiz vakillariga o‘zbek tilini chet elliklar o‘rtasida targ‘ib qilish va o‘rgatishga mo‘ljallangan mobil ilova yaratish taklifini ham bildirdi. Buning uchun nima zarur bo‘lsa, ko‘maklashamiz, dedi. Bu taklifdan ruhlandik va uni albatta, amalga oshirishni rejalashtirdik. Shu bilan birga kurslarni yanada ko‘paytirmoqchimiz. Xususan, rusiyzabonlar uchun rus tilidagi inglizcha darslarini ham yo‘lga qo‘yishni maqsad qilganmiz”, — dedi Sardor Sodiqov.