Дунёда коронавирусга чалиниш ҳолатлари сони сўнгги бир кеча-кундузда 657 мингтадан ошди, деб ёзади «РБК» Жаҳон соғлиқни сақлаш ташкилоти маълумотларига таяниб. Бу сўнгги ҳафта ичидаги навбатдаги рекорд кўрсаткичдир.
ЖССТ маълумотларига кўра, дунёда сўнгги 24 соат ичида COVID-19’га чалиниш билан боғлиқ 657 312 та ҳолат қайд этилган, пандемия бошидан буён касалланганлар сони 53 миллион 164 минг 803 кишига етган. Сўнгги бир кеча-кундузда 9797 киши, бутун пандемия даврида — 1 миллион 300 минг 576 киши вафот этган. Касалланганлар сони энг юқори бўлган мамлакат бешлигига АҚШ, Ҳиндистон, Бразилия, Россия ва Франция киради.
Эслатиб ўтамиз, 14 ноябрь куни ЖССТ бир сутка ичида бутун дунё бўйлаб яна 628 136 кишида коронавирус тасдиқлангани, бу пандемия бошланганидан буён сутка давомида қайд этилган энг юқори кўрсаткич эканлигини маълум қилганди.
Америкалик олимлар мутация SARS-CoV-2 коронавирусининг дунё бўйлаб тарқалишини янада тезлаштиргани, бироқ бунинг натижасида патогеннинг хавфлилиги ортмаганини маълум қилди.
Аввалроқ ЖССТ COVID-19 қаршисидаги қўрқувдан қутулиш усулини маълум қилганди. Коронавирус пандемияси даврида қўрқув ва стрессдан қутулишга кун тартибига доимий риоя қилиш ёрдам беради. Масалан, ҳар куни бир вақтда уйқуга ётиш ва уйқудан туришга ҳаракат қилиш, мунтазам равишда соғлом овқатланиш ва спорт билан шуғулланиш, шунингдек, ишдан дам олиб туриш керак.
Изоҳ (0)