Республика таълим маркази директори мактабларда жорий қилинаётган Science фани қайсидир фандан воз кечиш эвазига киритилмаётганини айтди

Ўзбекистон умумтаълим мактабларида 1—6-синфларида Science (табиий) фани ўқитилиши, у туфайли мавжуд дарс соатлари қисқармаслиги, аксинча, таълим сифатини ошириш учун мавжуд фанларнинг интеграцион тарзда ўқитилиши маълум қилинди. Бу ҳақда АОКАда ўтказилган брифингда Республика таълим маркази директори Шуҳрат Сатторов гапириб берган.

«Science фани амалга киритилишидан олдин халқаро амалиёт, Ўзбекистонда ишлаётган хусусий ва хорижий экспертларнинг тажрибаси ўрганилган.

Янги фан ўқувчиларни кичик ёшидан табиий фанларни ўқишга рағбатлантириш, уларда олам ҳақида яхлит тасаввур пайдо қилишга ёрдам беради. Бунинг билан бола физика-кимё қийин эмас, қизиқ фан эканини англайди ва уни ўрганишга ўзида рағбат сезади.

Science фани қайсидир фандан воз кечиш ёки қайсидир фаннинг ўрнига жорий этилаётгани йўқ. Аксинча, таълим сифатини ошириш учун мавжуд фанларнинг интеграцион тарзда ўқитилишини таъминлайди.

Масалан, ёмғир ҳақида ўрганиш жараёнида бола унинг таркиби, физик хусусиятлари, қайси фаслларда ва қаерларда ёғиши, ёмғир таъсирида Ерда қандай ўзгаришлар бўлиши, ўсимликлар учун фойдаси, табиатдаги ёмғирларнинг ўзгариши каби маълумотларга эга бўлади.

Science фани 1-2-синфда атрофимиздаги олам, 3-4 синфда табиатшунослик; юқори синфларда эса 4 та алоҳида фан, география, биология, физика (6-синфдан бошлаб), кимё (7-синфдан бошлаб) фанларини ўзида бирлаштиради.

Айни пайтда 1-2-синфда aтрофимиздаги олам (1 соат), 3-4-синфда табиатшунослик (1 соат), 5-синфда ботаника, география, физика 1 соатдан, 6-синфда 2 соатдан, жами 12 соат ўқитилади. Ҳозирги таклифларга кўра, Science фани 1-синфда бир соат, 2-4-синфда икки соатдан, 5-6-синфда эса 3 соатдан, жами 13 соат ўқитилиши тавсия этилмоқда. Шунга кўра, табиий фанлар бошқа фанларнинг соатини қисқартирмайди.

Табиий фанларни жорий этишдан олдин танлаб олинган мактабларда шу ўқув йилининг тўртинчи чорагида тажриба асосида фанни ўқитишни бошлаймиз. Бу муддатда ўқув дастурлари, дарсликлар, дарс соати таҳлил қилиб қайта кўрилади, тажриба натижалари асосида 13 соатлик таклиф ўзгариши мумкин.

7-11-синфлардан эса фанларнинг ўқитилиши доимий тартибда давом эттирилади», – деган Шуҳрат Сатторов.