Тошкент—Ҳожикент йўналиши бўйича ҳаракатланаётган шаҳарлараро электропоезд темир йўл излари орасида ухлаб ётган маст эркакни туртиб юборди. Бу ҳақда ИИВ Транспортда хавфсизликни таъминлаш бош бошқармаси хабар берди.
11 ноябрь куни соат 20:50 да Тошкент минтақаси темир йўл ТХТБга келиб тушган маълумотга кўра, шаҳарлараро ҳаракатланаётган электропоезд Чирчиқ—Аранча темир йўл бекатлари оралиғи 37-километрида ҳаракатланиб кетаётган вақтида номаълум эркак кишини туртиб юборганлиги сабабли тўхтаган.
Воқеа жойига чиқилганда ушбу номаълум шахс Тошкент вилояти Бўстонлиқ туманида яшовчи, 1976 йилда туғилган У.Т. эканлиги ва темир йўл излари орасида маст ҳолатда ухлаб ётганлиги сабабли электропоезд тўхташга мажбур бўлганлиги аниқланган.
Ушбу фуқарога биринчи тиббий ёрдам кўрсатилиб, Чирчиқ шаҳар Шошилинч тиббий ёрдам бўлимига юборилган. Поезд соат 20:35 да тўхтаб, соат 20:57 да йўналиши бўйича ҳаракатланиб кетган.
Мазкур ҳолат юзасидан суриштирув ишлари давом этмоқда.
Аввалроқ Самарқандда юк поезди қулоқчин таққан йигитни уриб кетмаслик учун фавқулодда тўхташни амалга оширгани, шунингдек, 2020 йилнинг январида Самарқанд вилоятида поезд уриб кетиши оқибатида уч киши, жумладан, 8-синф ўқувчиси ҳалок бўлгани тўғрисида хабар берилганди.
Изоҳ (0)