Женевада Халқаро Миграция Ташкилоти (ХМТ)нинг Тошкентдаги тўлақонли ваколатхонасини очишни кўзда тутувчи ҳамкорлик тўғрисидаги битимни имзолаш маросими бўлиб ўтди. Бу ҳақда «Дунё» ахборот агентлиги хабар қилган.
Ўзбекистон 2019 йилда ташкилотнинг тўлақонли аъзосига айланган ва бу республика билан ташкилот ўртасидаги ҳамкорликни фаоллаштиришга ҳисса қўшди. Аввал Ўзбекистон Олий Мажлиси Сенатининг раиси Танзила Норбоева Женевага ташрифи чоғида ХМТ бош котиби Антонио Виторино билан учрашгани хабар қилинган.
Маросим якунида Антонио Виторино Ўзбекистонни ХМТнинг 173-аъзоси сифатида самимий қутлаб, Ўзбекистон томони билан жадал ривожланиб бораётган ҳамкорлик сифат жиҳатидан янги босқичга кўтарилаётганини қайд этган.
«2015 йилда Тошкентда ХМТнинг офиси очилганидан буён биз Ўзбекистон раҳбариятининг миграцияни самарали ва замонавий бошқариш тизимини шакллантиришга бўлган қизиқиши ва қатъий амалий қадамлари тобора ортиб бораётганига гувоҳ бўлмоқдамиз. Республика сиёсий ва ижтимоий-иқтисодий ислоҳотларга очиқлигини, қўшни давлатлар билан муносабатларида прагматизмни намойиш этди ва ажойиб натижаларга эришди. Биз президент Шавкат Мирзиёевнинг шахсан мамлакат миқёсида миграция масалаларига устувор аҳамият бергани ва халқаро миграция муаммолари бўйича ҳамкорликка бағишланган минтақавий ва глобал ташаббусларда фаол иштирок этиши ва қўллаб-қувватлашини тан оламиз ва қадрлаймиз», — деган ХМТ бош котиби Антонио Виторино.
«Дунё» ахборот агентлигининг хабарида қайд этилишича, Ўзбекистон биринчилардан бўлиб Миграция бўйича Глобал шартномани қўллаб-қувватлади ва уни тўлиқ амалга оширишда қатъиятини намойиш этди. Мамлакат минтақада биринчи бўлиб Глобал шартномани амалга оширишда миллий даражада эришилган ютуқлар тўғрисида ҳисобот берди.
Ўзбекистоннинг хориждаги ўз фуқароларини қўллаб-қувватлаш, шунингдек, хорижий давлатлардаги COVID-19 инқирозидан азият чекаётган ва республикага қайтиб келганларга ёрдам кўрсатишга қаратилган саъй-ҳаракатлари ҳам алоҳида таъкидлаб ўтилган.
Изоҳ (0)