Тошкент вилоятининг Олмалиқ шаҳрида 18-йўналиш бўйлаб лицензия асосида йўловчи ташимоқчи бўлган Damas ҳайдовчилардан кунига 90 мингдан 110 минг сўмгача пул талаб қилган икки аёл қўлга олинди. Бу ҳақда ИИВ Транспортда ХТББ матбуот хизмати хабар берди.
Маълумотларга кўра, 9 ноябрь куни Зангиота туманида яшовчи С.Н. ҳамда Тошкент шаҳар Мирзо Улуғбек туманида яшовчи Э.Ш. ДХХга ариза билан мурожаат қилган. Мурожаатда улар ўзларига тегишли Damas автомобилларида Олмалиқ шаҳри бўйлаб қатновчи 18-йўналишда йўловчи ташиш учун лицензия олиб иш бошламоқчи бўлганларида шаҳарнинг «Ойдин» бекатида бир неча шахс уларга ушбу йўналишда фаолият олиб боришлари учун кунига 90 минг сўмдан 110 минггача (улуш) пул бериб туришлари лозимлигини айтганини билдирган. Бунга кўнмаган ҳайдовчиларнинг машиналарига шикаст етказиш орқали таҳдид қилинган.
Ариза юзасидан олиб борилган терговга қадар текширув ҳаракатлари давомида Ю.Б., Т.Н., Н.С., И.У. ҳамда А.А. олдиндан тил бириктириб, Олмалиқ шаҳри ҳудудида қатновчи 18-йўналиш бўйича йўловчи ташиш фаолияти билан шуғулланувчи ҳайдовчиларга босим ўтказиб, кунига 90 минг сўмдан 110 минг сўмгача пул талаб қилаётганлари аниқланган. Маълум бўлишича, улар талабларига бўйсунмаганларга автоуловларига шикаст етказишлари, ЙҲХБ ва Транспорт бошқармаси ходимларини жалб қилиб, рейдлар ташкиллаштириб, уларга фаолият билан шуғулланишга йўл қўймасликларини айтиб қўрқитган.
ДХХ, Республика транспорт прокуратураси, Тошкент транспорт прокуратураси ҳамда ИИВ Транспортда ХТББ ходимлари томонидан холислар иштирокида «Ойдин» бекатида ўтказилган тезкор тадбир давомида ариза муаллифи С.Н. ҳамда Э.Ш.дан Оҳангарон шаҳрида яшовчи 62 ёшли ва 27 ёшли аёл бир кунлик 120 минг ва 90 минг сўм миқдордаги пулларни олган вақтида тадбир иштирокчилари томонидан қўлга олинган.
Ушбу ҳолат юзасидан шу йил 10 ноябрь куни Жиноят кодексининг 165-моддаси (товламачилик) 2-қисм «в» банди билан жиноят иши қўзғатилди.
Ҳозирда тергов ҳаракатлари давом эттирилмоқда.
Изоҳ (0)