Швеция Жамоатчилик соғлиғини сақлаш агентлиги мамлакатда кузда коронавируснинг иккинчи тўлқини борасидаги прогнози хато бўлиб чиққанини тан олди. Бу ҳақда «РБК» хабар бермоқда.
Швеция бош эпидемиологи Андерс Тегнелл кузда мамлакатдаги эпидемиологик вазият жамоавий иммунитет ишлаб чиқарилиши ҳисобига карантин жорий қилган Финляндия ва Норвегия каби бошқа Скандинавия давлатларига нисбатан яхшироқ бўлади деб ўйлаган эди.
Аслида эса COVID-19 билан касалхонага ётқизилаётганлар сони ҳозирда Швецияда Европанинг бошқа ҳар қандай мамлакатига нисбатан тезроқ ўсмоқда. Стокгольмда эса инфекцияга топширилаётган ҳар бешинчи тест ижобий чиқмоқда. Ҳукумат томонидан танланган COVID-19’га қарши кураш стратегиясидан норози бўлган вирусолог Лена Эйнхорн фикрича, вирусга шведча ёндашув муваффақиятсизликка учради.
«Тўрт кун аввал бизда коронавирусга чалиниш ҳолатлари аҳоли бошига Финляндияга нисбатан 8 марта ва Норвегияга нисбатан 3,5 марта кўпроқ қайд этилганди. Аммо бизда иммунитет пайдо бўлиши кераклиги ҳисобига уларда кузда вазият ёмонроқ бўлиши керак эди», — деди Эйнхорн.
Айни пайтгача Швецияда 171 365 киши коронавирусга чалинган, 6122 киши вафот этган. 5 ноябрь куни мамлакатда эпидемия бошидан буён суткалик антирекорд қайд этилди — бир кеча-кундузда 4744 киши касалликка чалинди. Финляндияда COVID-19 беморлари сони, Жонс Ҳопкинс университети маълумотларига қараганда, ҳозирда 18,5 минг кишидан ошади, Норвегияда эса 27,2 мингдан ортиқ ҳолат аниқланган.
Баҳорда Швеция ҳукумати жамоавий иммунитет ишлаб чиқарилиши натижасида коронавирус тарқалиши ўз-ўзидан тўхташига умид қилиб, қатъий чекловлар киритишдан бош тортган эди.
Аммо июнда бош эпидемиолог Тегнелл мамлакатнинг COVID-19’га нисбатан стратегияси фавқулодда кўп ўлимларга олиб келганини тан олганди. Июлда Швецияда ҳукуматнинг коронавирусга қарши курашга ёндашувини текшириш учун комиссия тузилганди.
Эслатиб ўтамиз, пандемия бошидан буён дунё бўйича 52 миллиондан ортиқ одам коронавирусга чалинди.
Изоҳ (0)