Ўзбекистон халқ таълими вазирининг биринчи ўринбосари Усмон Шарифхўжаев умумтаълим муассасалари хусусий секторга топширилса, қанча мактаб хусусийлаштирилиши кутилаётгани ва бунда тадбиркорларга қандайдир имтиёзлар яратилиши ҳақидаги саволга жавоб қайтарди. Бу ҳақда «Kun.uz» хабар берди.
«Хусусийлаштириш деган сўзнинг ўзи хато. Мактаблар хусусийлаштирилмайди. Тадбиркор шу мактаблар ҳудудида давлатга ўз ёрдамини бермоқчи бўлса, таклиф қилинади ва унга давлат томонидан бир қатор имкониятлар берилади», — деди Усмон Шарифхўжаев.
Унинг сўзларига кўра, тадбиркор мактабга келиб, уни мавжуд жамоа билан бошқаришга жалб қилинади. Ҳозир ҳам хусусий мактаб очган жуда кўп тадбиркорлар бор. Уни ривожлантириш ёки филиалини ташкил қилиш учун имконият қидирмоқда, лекин ер тополмаслиги мумкин ёки унга таклиф этилган жойлар тўғри келмаслиги мумкин.
Вазир ўринбосарининг билдиришича, тадбиркорлар томонидан маълум бир мактаблар бошқариш бўйича таклифлар бор. «Лекин бу ҳар қандай мактабни исталган одам олиши мумкин дегани эмас. Қарорда 0,7 коэффициентдан паст дея назарда тутилмоқда», — дея таъкидлаган вазирлик вакили.
Усмон Шарифхўжаев қайд этиб ўтилган коэффициентни тушунтириб берган. Мактабда мингта ўқувчи ва мингта ўрин бўлиши мумкин. Агар шу мактабда мингта ўринда мингта бола ўқиса, бу 1 коэффициент дегани. Агар мактаб икки сменали бўлса, 2 коэффициент бўлиши мумкин. Айрим ҳудудларда 2,5 коэффициент ҳам бор. Бундай мактабларда қўшимча таълим, тўгараклар, болалар билан дарсдан ташқари ишлашга имконият чекланган.
Унинг қайд этишича, бор қувватидан паст даражада ишлайдиган мактаблар ҳам бор. Улар тобора камайиб бормоқда. Яъни мингта ўринда 700, 600, 500 нафар бола ўқийди. Мана шундай мактабларга тадбиркорлар таклиф этилади. Уларга шарт қўйилади: ўқиётган болалар, микроҳудудга кирган болаларни текин ўқитиш, ўқитувчиларга шароит яратиш, мактаб моддий базасини ривожлантиришда ёрдам бериш. «Шу шартларга кўнса, бу жараёнга киради», — деди вазир ўринбосари.
Усмон Шарифхўжаевнинг маълум қилишича, ўз навбатида, тадбиркорга мактабнинг бўш ҳудуди, биноси, ерида таълимга алоқаси бор бўлган объектни барпо этиб, юргизиш имконияти берилади. Мактаблар ишончли бошқарувга беш йил муддатга кейинчалик қўшимча муддат берилиши имконият билан берилади.
Унинг айтишича, давлат раҳбарининг 30 октябрда ўтказилган селекторида Молия вазирлиги ва Марказий банкка шу соҳада, йўналишда ишлайдиган тадбиркорларга мактабларни ривожлантиришда харажатларни қоплаш, кредитлар бериш тартибини ишлаб чиқиш масаласи қўйилган.
Усмон Шарифхўжаев беш йил ичида бу тажриба ўзини оқлайдиган бўлса ҳам, мактаб хусусийлаштириб берилмаслиги, фақат муддат узайтириб берилиши мумкинлигини айтиб ўтди.
«Беш йилдан кейин муддати яна узайтириб берилади. Бу ерда хусусийлаштириш ҳақида гап кетаётгани йўқ. Ишончли бошқарув. Давлат ўз вакили сифатида тадбиркорга беради, у тадбиркор сифатида ўз фаолиятини олиб боради», — дея таъкидлаган вазир ўринбосари.
Аввалроқ Тошкент шаҳри, Тошкент вилояти, Нукус шаҳри ва вилоятлар марказларидаги навбатлилик коэффициенти 0,7 дан паст бўлган мактаблар 5 йилга хусусий бошқарувга ўтказилиши ҳақида хабар берилганди.
Эслатиб ўтамиз, 30 октябрь куни Шавкат Мирзиёев раислигида ўтказилган таълим соҳасидаги муаммолар, уларни ҳал этиш ва таълим сифатини оширишга бағишланган видеоселекторда мамлакатда хусусий таълим муассасаларига кенг шароит яратилаётгани боис келгуси йилдан эксперимент тариқасида кам қувватда ишлаётган мактабларни танлов асосида салоҳиятли талабгорларга ишончли бошқарувга бериш таклифи билдирилганди. Йиғилишда, хусусан, Тошкент шаҳридаги 32 та мактабда ўқувчиларни қамраб олиш даражаси пастлиги қайд этилган.
Изоҳ (0)