O‘zbekistonda yangi tashkil etilgan Pillachilik qo‘mitasi 1,5 mlrd so‘mga Chevrolet Tahoe, Malibu va Lacetti sotib oldi
O‘zbekiston Pillachilik va qorako‘lchilikni rivojlantirish qo‘mitasi Chevrolet Tahoe, ikkita Malibu va Lacetti sotib oldi. Bu haqda davlat xaridlari saytiga tayanib, “Gazeta.uz” xabar berdi.
Sotib olish shartnomalari 3, 4, 5-noyabr kunlari imzolandi. Tahoe 795 million so‘mga, Malibu 2 eng qimmat konfiguratsiyada 324,4 million so‘mga, yana bir Malibu 2 311,1 million so‘mga, Lacetti esa 115,6 million so‘mga sotib olingan. Hammasi bo‘lib avtomobillar sotib olishga qo‘mita 1,5 milliard so‘mdan ortiq mablag‘ sarflagan.
Hujjatlarda sotib olish sabablari ko‘rsatilmagan, biroq ularning xizmat maqsadlarida foydalanish uchun sotib olingani aniq.
Pillachilik va qorako‘lchilikni rivojlantirish qo‘mitasi Prezidentning 2020-yil 2-sentabrdagi farmoni bilan tashkil etilgan edi. Davlat organining markaziy apparati tarkibiga rais, uning yordamchisi, birinchi o‘rinbosari va o‘rinbosari, ikkita bo‘lim boshlig‘i, matbuot kotibi va boshqalar kiradi.
2021-yilgi davlat budjeti loyihasiga ko‘ra, qo‘mitaga 12 milliard so‘m ajratish taklif qilinmoqda.
Avvalroq Madaniyat vazirligi davlat xaridlari doirasida ikkita Chevrolet Malibu 2 avtomobilini eng qimmat konfiguratsiyasida sotib olgani to‘g‘risida xabar berilgandi. Mazkur xarid vazirning yana bir o‘rinbosari lavozimining joriy etilishi, shuningdek, vazirning birinchi o‘rinbosari avtomobilining “eskirishi” bilan izohlandi.
Eslatib o‘tamiz, shu yilning fevral oyida Moliya vazirligi xizmat avtomobillarini sotib olish bo‘yicha budjet xarajatlari optimallashtirilishi haqida ma’lum qilgan edi. O‘shanda vazirlik ushbu yo‘nalishdagi qonunchilik (Vazirlar Mahkamasining 2011-yildagi qarori) juda eskirganini ta’kidlab o‘tgandi.
Mavzuga doir: Zarbdor tumani hokimi Zafar Ro‘ziyev Captiva xizmat mashinasi bo‘la turib, 370 million so‘mga Trailblazer sotib oldi
