Ҳиндистонда «ўлик» чақалоқ дафн қилинишидан аввал уйғониб кетди

Ҳиндистоннинг Ассам штатида ўлик деб тахмин қилинган чақалоқ кўмилишидан олдин уйғонди. Бу ҳақда Times of India хабар берди.

Маълум бўлишича, ота-она икки ойлик касал чақалоғини шифохонага олиб келган, аммо ўша вақтда ҳеч қандай шифокор ва ҳамшира топилмаган. Лекин ёш фармацевт чақалоқни текшириб, уни ўлик деб топган.

Ота-она болани кўмишга тайёргарлик кўра бошлаганида чақалоқ онасининг қучоғида қимирлаган. Улар болани яна касалхонага олиб боришга шошилган, сўнгра чақалоқни каттароқ тиббий муассасага етказишга қарор қилган, аммо бола йўлда вафот этган.

Эртаси куни шифохона олдида боланинг ота-онаси ишлайдиган чой плантациясининг 1200 га яқин ишчиси йиғилган. Намойиш полиция идораси олдида ҳам давом этган. Намойишчилар боланинг ҳаётига нисбатан хато қарор қабул қилган фармацевт ҳибсга олинишини талаб қилган.