«Вазир онлайн» видеоконференциясида Маданият вазири ва вазирлик ходимлари томонидан интернетда тарқалган вазирликка доир хабарларга ойдинлик киритилди. Шунингдек, вазирликда кутилаётган янгиликлар, ўзгаришлар тўғрисида маълумотлар берилди. Бу ҳақда «Kun.uz» хабар қилган.
Видеоконференцияда Маданият вазири Озодбек Назарбеков бош прокурор иштирокидаги йиғилишда ошкор этилган вазирликдаги коррупцион ҳолатлар юзасидан берилган саволга ҳам жавоб қайтарган.
«Аввало шуни айтиш керакки, бу ҳол вазирлик учун уятли. Афсуски, мен бу воқеадан жиноят иши очилгандан сўнг хабар топдим. Яъни тендерда қатнашмаганман.
Фирма вазирликка намуна тарзида тоза гримни кўрсатган. Лекин театрларга оддий маҳсулот етказилган. Бизга театр ходимлари шикоят қилишганидан сўнг жиноят иши очилди», – деди Озодбек Назарбеков.
Мавзуга доир: «Элакни кўтаришни ўзим илтимос қилганман». Озодбек Назарбеков Маданият вазирлигидаги коррупцион ҳолатлар ҳақида
У ўзининг жиноий режаларига кўра, вазирлик харидларини фуқаро К. ва унинг яқинларига тегишли фирмаларга бериш учун 26 минг доллар улуш олган.
Шундан сўнг вазирлик тизимидаги театр, маданият уйлари ва бошқа ташкилотларга зарур грим маҳсулотлари учун таниши К.га тегишли фирмаларга 2,6 миллиард сўм ўтказиб берилган.
Ўз навбатида, бу фирмалар грим ўрнига «Ўрикзор» бозоридан 264 миллион сўмга арзон ва сифатсиз косметика маҳсулотларини сотиб олиб, уни грим эканлиги ҳақида сохта ҳужжатларни тузиб, вазирликка топширган. Вазирлик эса маданият муассасаларига умуман керак бўлмаган бу маҳсулотларни грим сифатида сохта ҳужжат қилиб, уларга етказиб берган.
Бош прокурор мазкур схемага кўра, маҳсулот нархи ҳужжатларда бир неча баробар қиммат кўрсатилиб, 2,3 миллиард сўм маблағ талон-торож этилганини маълум қилган.
Изоҳ (0)